نەخۆشێک لەبەغدا 30 ساڵە یەک جار نەخۆشخانەی جێهێشتووە

ئاڤا نیوز

وائیل هادی، توشی نەخۆشییەکی دەگمەن دەبێت، بەهۆیەوە 30 ساڵی تەمەنی لە نەخۆشخانەی فێرکاریی یەرمووک لەشاری بەغدا بەسەر بردووە.

چیرۆکی سەرەکی: لە 3-4- 1995، وائیل ئەوکات تەمەنی 12 ساڵ بووە، تووشی ڤایرۆسێکی "دەگمەن" دەبێت پێی دەگوترێت هەوکردنی تووندی ماسولکەکان، ئەم ڤایرۆسە بووە هۆی دابڕانی پەیوەندی نێوان مێشک و جەستەی، ئەمەش وایکرد وائیل جوڵە لەدەست بدات، پاش ئەوە ڤایرۆسەکە سییەکانی لاواز کرد و دەبێت بۆ هەتا هەتایی ژیانی لەسەر ئامێری هەناسەدان بێت.

لێدوانی فەرمی: وائیل هادی هێشتا ئومێدی بەژیان ماوە بە زەردەخەنەوە بەئاڤای گوت : "من ژیانم خۆشدەوێت و باوەڕم بە خودا هەیە کە ڕۆژێک چارەسەر وەردەگرم و چاک دەبمەوە و دەگەڕێمەوە نێو خەڵکی".

لەلایەکی دیکەوە: دکتۆر ئەزهەر عەلا، پسپۆڕی چاودێری چڕ کە ماوەی چوار مانگە چاودێری وائیل دەکات، ڕایگەیاند: " ئێستا چارەسەرێک لە ئەمریکا بۆ نەخۆشییەکەی وائیل و ئەوانی هەڵگری ئەو ڤایرۆسەن دۆزراوەتەوە ئەویش لەڕێگەی ئامێرێکی بچووکە و بە پاتری کاردەکات، ئەو ئامێرە دەچێنرێتە نێو سییەکان و چالاکی دەکات بۆ هەناسەدان.

ئەمەش بزانە: لە ساڵی 1995 ـەوە وائیل تەنیا جارێک نەخۆشخانەی بەجێهێشتووە، ئەویش ساڵی 2003 بوو لەکاتی ڕووخانی ڕژێمی بەعسدا بەهۆی تاڵانکردنی ئامێرەکانی نەخۆشخانەی یەرمووک بۆ نەخۆشخانەی عەدنان گواستراوەتەوە، سەرەڕای دابڕانی لە جیهانی دەرەوە، وائیل لە ڕێگەی ئینتەرنێت و سەیرکردنی فیلم و زنجیرە تەلەفزیۆنییەکانەوە فێری هەردوو زمانی تورکی و ئینگلیزی بەباشی بووە.