کێشەی 13 پڕۆژەی گەورەی نیشتەجێبوون چارەسەر دەکرێت

ئاڤا نیوز

ئاڤا لەسەر داواکاری دەیان هاونیشتمانی، بەدواداچوون بۆ کێشەی پڕۆژەکانی نیشتەجێبوون دەکات، ئەو پڕۆژانەی زیاتر لە 10 ساڵە دەستیان پێکراوە و تەواو نەبوون.

وێنە گەورەکە: بەگشتی لە هەرێمی کوردستان 14 پڕۆژەی نیشتەجێبوون و بازرگانی کێشەی تەوابوونیان هەبوو و هەزاران کەس لێیان زەرەرمەند بوون، لە کابینەی نۆیەم لیژنەیان بۆ پێکهێنراوە و کار لەسەر چارەسەرکردنی کێشەکەیان دەکرێت .

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنانی کوردستان بە ئاڤا نیوزی گوت: "لەگەڵ دەستبەکاربوونی کابینەی نۆیەم، سەرۆکوەزیران مەسرور بارزانی دەستەی وەبەرهێنانی ڕاسپارد کێشەی سەرجەم پڕۆژەکان چارەسەر بکات، دواتر لە هەرسێ پارێزگای هەولێر، سلێمانی و دهۆک لیژنە بۆ پڕۆژە وەستاوەکان پێکهێنرا".

پارێزگای هەولێر؛ شەش پڕۆژەی تەواو نەکراو هەبوون: دەشتی بەهەشت، پڕۆژەکانی ئەڵمانی، فلۆریا سیتی، مەم و زین، کاپیتاڵ تاوەر و کۆیە سیتی.

پارێزگای سلێمانی؛ هیچ پڕۆژەیەکی وەبەرهێنانی نیشتەجێبوون نەوەستاوە، تەنیا پڕۆژەی سەیران سیتی نەبێت کارەکانی بەخاوی بەڕێوەبردووە و ئەویش ئاگاداری پێدراوە.

پارێزگای دهۆک؛ هەریەکە لە پڕۆژەکانی (ئارام سیتی، هێژا سیتی، دهۆک سیتی، سیتی ستار، پڕۆژەی ئێم دی و نیوسێمێل) کێشەیان هەبوو. 

چارەسەر و ئەنجام: بەرگەشت ئاکرەیی دەڵێت: 13 پڕۆژە کێشەکەیان چارەسەر کراوە، هەندێکیان لە قۆناغی ڕادەستکردنن و هەندێکی دیکەیان لە قۆناغی پێدانن بە وەبەرهێنەر بۆ ئەوەی تەواویان بکەن.

٠ لە هەولێر دەشتی بەهەشت لیژنەی بۆ پێکهاتووە و چەند وەبەرهێنەرێک هاتوونەتە پێش و کێشەکەیان چارەسەر دەکرێت. پڕۆژەی کاپیتاڵ تاوەر کە پڕۆژەیەکی بازرگانیشە، لیژنەی بۆ پێکهێنراوە و لە قۆناغی چارەسەرە. لە هەولێر تەنیا پڕۆژەی کۆیە سیتی کێشەی تێدا ماوە، ئەمەش بەهۆی ئەوەی هیچ وەبەرهێنەرێک نەهاتووەتە پێش بۆ وەرگرتنی.

٠ لە دهۆک پڕۆژەکانی ئێم دی و نیوسێمێل نەبێت لەژێر دەستی لیژنەیە و بەرەو چارەسەرە، ئەوانی دی هەمووی کێشەکانی چارەسەرکراوە و تەنانەت بەشێکیان ڕادەستی هاوبەشەکانیان کراون.