ترەمپ پڕۆژەیاسای بودجەی ئەمریکا واژۆ دەکات

 

ئاڤا نیوز

دۆناڵد ترەمپ پڕۆژەیاسایەکی کاتی بۆ دابینکردنی بودجە بۆ دامەزراوەکانی ئەمریکا واژۆکرد، ئەمەش دوای ململانێیەکی زۆر لە نێوان کۆمارییەکان و دیموکراتەکان لەسەر بەندەکانی پڕۆژەیاساکە.

چیرۆکی سەرەکی: ڕۆژی هەینی ئەنجوومەنی پیرانی ئەمریکا پڕۆژەیاسای کاتی بودجەی دۆناڵد ترەمپی بۆ ماوەی شەش مانگ، بە دەنگی 54 دەنگی بەڵێ، و بە یارمەتی 10 ئەندامی دیموکراتەکان پەسەندکرد، سەرەڕای دژایەتیکردنی پڕۆژەیاساکە لەلایەن دیموکراتەکان.

لێدوانی فەرمی: هاریسۆن فیڵدز، جێگری وتەبێژی کۆشکی سپی ڕایگەیاند، دۆناڵد ترەمپ ئەمڕۆ واژۆی لەسەر بڕیارنامەی بودجەی ئەمریکا کردووە.

بۆچوونی لایەنی بەرامبەر: دیموکراتەکانی ئەمریکا دەڵێن، پڕۆژەیاساکە قەبارەی چاودێری تەندروستی و نیشتەجێبوون و ئەولەویەتەکانی دیکە کەم دەکاتەوە و دەرفەتی بەرفراوان دەدات بە ترەمپ بۆ ئاڕاستەکردنەوەی خەرجییە فیدراڵیەکان تەنانەت لەکاتێکدا ئیدارەکەی و وەزارەتی کارایی حکومەت بە خێرایی دەزگا و بەرنامە پەسەندکراوەکانی کۆنگرێسی ئەمریکا هەڵدەوەشێننەوە.

زانیاری زیاتر: دوای چەندین ڕۆژ لە ململانێ، لە کۆتاییدا بەشێک لە سیناتۆرە دیموکراتەکان بڕیاریان دا کە داخستنی حکومەتی ئەمریکا خراپترە لەوەی کە ڕێگە بدرێت پڕۆژە یاسای بودجەی ترەمپ تێپەڕێنرێت.

ئەوەی پێویستە بیزانیت: پڕۆژەیاساکە تاڕادەیەکی زۆر قەبارەی بودجەی تەرخانکراوی بەراورد بە سەردەمی سەرۆکایەتی جۆ بایدن کەمکردووەتەوە. دیموکراتەکانی ئەنجوومەنی پیران چەند ڕۆژێکە مشتومڕیان لەسەر ئەوەیە کە کۆمارییەکان لە ئەنجوومەنەکەدا بەبێ بەشداریکردنی ئەوان ڕێوشوێنی خەرجییەکانیان داڕشتووە و پەسەندیان کردووە.

ژمارەکان وا دەڵێن: بودجەی تەرخانکراو بۆ پڕۆژەیاساکە یەک تریلیۆن و 600 ملیار دۆلارە، زۆربەی ئەو خەرجییانەی لە ئیدارەی جۆ بایدن هەبوون وەک خۆی هێشتوویەتییەوە، بەڵام هەندێک گۆڕانکاری سەرەکی کردووە، بە جۆرێک خەرجییە بەرگرییەکانی ئەمریکا بە بڕی 6 ملیار دۆلار زیاد کردووە و گەیشتووەتە 893 ملیار دۆلار، بۆ نموونە بۆ بەهێزکردنی ئاسایشی سنوورەکان، چاودێری تەندروستی سەربازە خانەنشین بووەکان و خەرجییە سەربازییەکان، بەڵام نزیکەی 13 ملیار دۆلار بودجەی کەرتەکانی دیکەی کەمکردووەتەوە کە 708 ملیار دۆلارە.

ئەمەش بزانە: پەسەندکردنی پڕۆژەیاسای بودجە سەرکەوتن بوو بۆ ترەمپ و مایک جۆنسۆن سەرۆکی ئەنجومەنی نوێنەرانی ئەمریکا، کاتێک کۆمارییەکان توانیان بەبێ پشتیوانی دیموکراتەکان پڕۆژەیاساکە پەسەند بکەن، ئەمەش لە ساڵانی ڕابردوودا ڕووینەداوە.