وەزارەتی دەرەوەی ئەمریکا ستایشی پڕۆژەی هەژماری من دەکات

ئاڤا نیوز

وەزارەتی دەرەوەی ئەمریکا وەسفی پڕۆژەی هەژماری من دەکات، بۆ یەکمجاریش ئاشكرای دەکات کە دابەشکردنی مووچەی 70 هەزار پێشمەرگە بە دیجیتاڵی کراوە و لەڕێگەی هەژماری منەوە مووچە وەردەگرن، تەنیا 17 هەزار پێشمەرگەش ماون مووچەیان بە دیجیتاڵی بکرێت.

وێنە گەورەکە: پڕۆژەی هەژماری من پڕۆژەیەکی ستراتیژی کابینەی نۆیەمی حکومەتی هەرێمی کوردستانە، کە ئامانجی بە بانکیکردنی مووچەی فەرمانبەرانە و لە ساڵی 2023 لە لایەن سەرۆکوەزیران مەسرور بارزانییەوە بڕیاری لەسەر درا.

زانیاریی زیاتر: ڕاپۆرتەکە دەربارەی چالاکییەکانی وەزارەتی دەرەوەی ئەمریکایە لە عێراق و سووریا، ورد و درشتی کارەکانی ئەمریکای لەو دوو وڵاتە لە ماوەی ساڵێکدا تێدایە.  بەشێکی ڕاپۆرتێکەی وەزارەتی دەرەوەی ئەمریکا ، بەتایبەت باسی هەرێمی کوردستان و جێبەجێکردنی پڕۆژەی هەژماری من دەکا لە وەزارەتی پێشمەرگە.

لە ڕاپۆرتەکەدا هاتووە "وەزارەتی پێشمەرگەی هەرێمی کوردستان هەوڵ دەدات خەرجییەکان و گواستنەوە داراییەکان بە ئەلیکترۆنی بکات. لەگەڵ ئەوەشدا مووچەی پێشمەرگە بە دیجیتاڵی کراوە و لەڕێگەی بانکەوە دابەش دەکرێت، ئەمەش یەکێکە لە چاکسازییەکانی وەزارەتی پێشمەرگە لەپێناو کەمکردنەوەی گەندەڵی".