شارەزایەکی ئابووری: دۆخی کارەبای عێراق لە هاویندا خراپ دەبێت

 

ئاڤا نیوز

شارەزایەکی ئابووری پێشبینی بۆ خراپی دۆخی کارەبا لە عێراق بۆ هاوین دەکات و ئاماژە بۆ ئەوە دەکات ئەو پەیامە دڵنیاکەرەوانەی کە وەزارەتی کارەبا هەوڵی بەبازاڕکردنی دەدات بۆ ڕای گشتی، وا بە ئاسانیی لەم چەند ساڵە جێبەجێ ناکرێن.

وێنە گەورەکە: دوای ئەوەی ئەمریکا کۆتایی بە بڕیاری لێخۆشبوونی کڕینی کارەبا و غازی ئێرانی لەلایەن عێراقەوە هێنا کە پێشتر وەک هاوکاری و ئاسانکارییەک بۆ عێراق دەریکردبوو تاوەکو بتوانێت لەو ڕێگەیەوە پێداویستییەکانی لە کارەبا پێ دابین بکات، پێدەچێت ئەمساڵ بە دیاریکراویش لە وەرزی گەرمادا عێراق ڕووبەڕووی کەمیی کارەبا ببێتەوە.

بڵاوکراوەی فەرمی: نەبیل مەرسوومی، پسپۆڕی ئابووری لە پۆستێکیدا لە تۆڕی کۆمەڵایەتی فەیسبووک دەڵێت: ئەو پەیامە دڵنیاکەرەوانەی کە وەزارەتی کارەبا هەوڵی بەبازاڕکردنی دەدات بۆ ڕای گشتی، بەم ڕاستیانەی خوارەوە تووشی شۆک دەبن:

٠ بەرهەمهێنانی ئێستای غازی ناوخۆ ناتوانێت ببێتە بەدیلێک بۆ غازی ئێران لە ئێستا و ئەمەش پێویستی بە چەند ساڵێکە.

٠  پڕۆژەکانی وزەی خۆر بەپێی باشترین خەمڵاندنەکان بە لایەنی کەم سێ ساڵیان پێویستە.

٠ بەکرێگرتن و دانانی سەکۆی ئاوی لە خور زوبەیر، پێویستی بە ماوەی ساڵێک زیاترە، لەکاتێکدا دروستکردنی سەکۆی جێگیر لە بەندەری فاو پێویستی بە زیاتر لە دوو ساڵ هەیە.

٠ زۆربەی پڕۆژەکانی بەستنەوەی تۆڕی کارەبا لەگەڵ وڵاتانی دراوسێ ئەمساڵ تەواو نابن، بەستنەوەی تۆڕی کارەبا لەگەڵ سعوودیە پێویستی بە سێ ساڵ هەیە، بەستنەوەی تۆڕی کارەبا لەگەڵ کوێت بە توانای 500 مێگاوات ئەمیش ئەمساڵ تەواو نابێت. دوو هێندە زیادکردنی کارەبا لە تورکیاوە بۆ عێراق لە 300 مێگاواتەوە بۆ 600 مێگاوات، ئەمەش پێویستی بە ڕەزامەندیی یەکێتی ئەوروپا هەیە.

ئەوەی پێویستە بیزانیت: ئەمڕۆ یەکشەممە 2025-03-16، وەزیری کارەبای عێراق و وەزیری وزە و سەرچاوە سروشتییەکانی تورکیا ڕێککەوتن لەسەر زیادکردنی هاوردەکردنی کارەبا بە دوو هێندەکردنی بڕەکەی لە 300 مێگاواتەوە بۆ 600 مێگاوات لە تورکیاوە بۆ عێراق.