وەزارەتی شارەوانی پڕۆژەیەکی گرنگ لە کەرتی 8ـی حەسارۆک جێبەجێ دەکات

ئاڤا نیوز

 

کاری خۆڵکاری بۆ شەقامە ناوخۆییەکان لە کەرتی 8ـی حەسارۆک دەستپێدەکات، وەزیری شارەوانیش دەڵێت، بەهۆی ئەو پڕۆژەیە ئاستی خزمەتگوزاریی شەقامە ناوخۆییەکانی کەرتەکە بەرزتر دەبێتەوە.

چیرۆکی سەرەکی: ئەمڕۆ دووشەممە 17-3-2025، ساسان عەونی، وەزیری شارەوانی و گەشتوگوزاری هەرێمی کوردستان، بەیاوەری ئومێد خۆشناو، پارێزگاری هەولێر و سەرۆکی شارەوانیی هەولێر، بەردی بناغەی پڕۆژەی کاری خۆڵکاری بۆ بەشێک لە شەقامە ناوخۆییەکانی زۆنی 'ئەی' لە کەرتی 8ـی حەسارۆک دانا.

لێدوانی فەرمی: ساسان عەونی، وەزیری شارەوانی و گەشتوگوزاری هەرێمی کوردستان ڕایگەیاند، لەسەر فەرمان و ڕاسپاردەی سەرۆکوەزیران مەسرور بارزانی، سەرۆکی حکومەتی هەرێمی کوردستان بەردی بناغەی ئەو پڕۆژە گرنگەی گەڕەکی 8ـی حەسارۆکمان داناوە کە بەگوژمەی 688 ملیۆن و 875 هەزار دینار، جێبەجێ دەکرێت.

بۆچی گرنگە: کاری خۆڵکاری بۆ شەقامە ناوخۆییەکان وادەکات قیرتاوکردنی شەقامەکان سەرکەوتووتر بێت و بەهۆیەوە ئاستی خزمەتگوزاریی دروستکردنی شەقامە ناوخۆییەکان، بەرزتر دەبێتەوە.