ئەعرەجی سەردانی نوێنەرایەتیی هەرێمی کوردستان لە بەغدا دەکات

ئاڤا نیوز


ڕاوێژکاری ئاسایشی نیشتمانیی عێراق بۆ گەیاندنی سەرەخۆشی بەبۆنەی ساڵیای کیمیابارانکردنی هەڵەبجە، سەردانی نوێنەرایەتی هەرێمی کوردستان لە بەغدا دەکات.

وێنە گەورەکە: بۆ یادی كیمیابارانی هەڵەبجە، ئەنفال، گۆڕە بەكۆمەڵەكان، ڕاپەڕینی شەعبانییە و كوشتنی زانایان، لە عێراق پشووی فەرمی بوو، میدیای فەرمی عێراقیش پرسی نیشتمانی گۆڕە بە کۆمەڵەکانی کردە دۆسیەی ڕۆژ و کەمتر ئاماژەی بە هەڵەبجەکرد. سەرۆکوەزیرانی عێراقیش لە پەیامی فەرمی حکومەت باسی هەڵەبجەی نەکرد، کەچی دواتر بەهۆی کاردانەوەکان لە پەیامێکی دیکەدا پۆزشی هێنایەوە و کارەساتی هەڵەبجەی بە یەکێک لە قێزەونترین تاوانەکانی جینۆساید ناساند کە لەلایەن ڕژێمی دیکتاتۆری لەناوچوو بە چەکی کیمیاوی ئەنجامدرا.

ڕاگەیێنراوی فەرمی: بەگوێرەی ڕاگەیێنراوی نووسینگەی ڕاگەیاندنی ڕاوێژکاری ئاسایشی نیشتمانیی عێراق، ئەمڕۆ دووشەممە 2025-3-17، قاسم ئەعرەجی  ڕاوێژکاری ئاسایشی نیشتمانیی عێراق سەردانی نوێنەرایەتی هەرێمی کوردستانی لە بەغدا کرد.

- ڕاوێژکاری ئاسایشی نیشتمانیی عێراق لەگەڵ فارس عیسا، نوێنەری هەرێمی کوردستان لە بەغدا کۆبووەوە سەرەخۆشی خۆی بەبۆنەی ساڵیادی کارەساتی پڕ لە ئازاری هەڵەبجە گەیاندە نوێنەری هەرێمی کوردستان لە بەغدا.

ئەوەی پێویستە بیزانیت: باس نەکردنی هەڵەبجە لەلایەن بەرپرسانی باڵای عێراق، لە میدیا و تۆڕەکۆمەڵایەتییەکان لە کوردستان کاردانەوەی لێ کەوتەوە و هێرشی میدیایی تووند کرایە سەریان و بە هەوڵێک بۆ بچووکردنەوەی پرسی هەڵەبجە لێکدرایەوە.