سەرۆکوەزیرانی کەنەدا دژ بە ئەمریکا لەگەڵ ماکرۆن کۆدەبێتەوە

ئاڤا نیوز

سەرۆکوەزیرانی کەنەدا لە پێناو دۆزینەوەی ڕێگە چارەیەک بۆ ڕووبەڕووبوونەوەی جەنگی بازرگانی ئەمریکا، ئەمڕۆ دووشەممە بە سەردانێکی فەرمی گەیشتە پاریس.

وێنە گەورەکە: مارک کارنی، سەرۆکوەزیرانی کەنەدا، لە یەکەم سەردانی فەرمی بۆ دەرەوی وڵات گەیشتە پاریسی پایتەختی فەرەنسا و لە لایەن ئیمانوێل ماکرۆن، سەرۆکی فەرەنسا پێشوازی لێکرا، هەردوولا کۆنگرەیەکی ڕۆژنامەوانییان بەست و جەختیان لە بەهێزکردنی پەیوەندی نێوان هەردوو وڵات کردەوە.

لێدوانی فەرمی: ئیمانوێل ماکرۆن، سەرۆکی فەرەنسا لە کۆنگرە ڕۆژنامەوانییەکەدا ڕایگەیاند: پشتیوان و هاوکاری کەنەدا دەبین و پێکەوە هەوڵی بونیادنانی ئابوورییەکی هاوبەش دەدەین، لە ڕێگەی بەرزکردنەوەی ئاستی بازرگانی نێوان فەرەنسا و کەنەدا هاوبەشیەکی گەورە و لە ئاستێکی باڵادا بونیاد دەنێین.

لە لایەکی دیکەوە: مارک کارنی ڕایگەیاند: ئەمڕۆ لە هەرکاتێکی تر زیاتر پێویستیمان بە پتەوکردنی پەیوەندییەکانمان لەگەڵ فەرەنسا هەیە، لە پێناو پاراستنی ئاسایشی هەردوو دەوڵەت پێویست دەکات پەیوەندییە بازرگانی و دیبلۆماسیەکانی نێوان هەدوو دەوڵەت پەرەپەپێبدەین و بەهێزی بکەین.

ئەوەی پێویستە بیزانیت: لە 4-3-2025 بە بڕیاری دۆناڵد ترەمپ، سەرۆکی ئەمریکا بۆ زیادکردنی باج لە سەر بەرهەمەکانی کەنەدا بە ڕێژەی 25% چووە بواری جێبەجێکردنەوە. لەبەرامبەردا کەنەداش بە ڕێژەی 25% باجی خستە سەر بەرهەمی هاوردەی ئەمریکی بە بەهای 155 ملیار دۆلار.