هەنگاوەكانی هەناردەکردنەوەی نەوتی کوردستان خێراتر دەكرێت

ئاڤا نیوز

پرسی دەستپێكردنەوەی هەناردەی نەوتی هەرێمی كوردستان لەڕێگەی بەندەری جەیهان، وەزیری وزەی توركیای هێنایە هەرێمی كوردستان و عێراق، جووڵە و گفتوگۆكان ئەوەمان پێدەڵێن؛ هەمووان پەرۆشی لابردنی بەربەستەكانن لەبەردەم دەستپێكردنەوەی پرۆسەكە.

وێنە گەورەکە: سەرەڕای هەموارکردنەوەی یاسای بودجەی عێراق و دیاریکردنی 16 دۆلار بۆ کۆمپانیاکان لەبەرامبەر تێچووی دەرهێنانی هەر بەرمیلێکی نەوت، بەڵام تاوەکو ئێستا هەولێر و بەغدا و کۆمپانیاکان نەگەیشتوونەتە ڕێککەوتن، ئەمە لەکاتێکدایە لەڕووی تەکنیکییەوە هیچ گرفتێک نەماوە، بۆری ئامادەیە و تورکیاش ئامادەیی خۆی دەربڕیوە.

چیرۆکی سەرەکی: ئەلپئەرسلان بایرەکتار، وەزیری وزە و سەرچاوە سرووشتییەكانی توركیا سەردانی هەولێر و بەغدای كرد و لەگەڵ بەرپرسانی باڵای هەرێمی كوردستان و عێراق پرسی هەناردەكردنەوەی نەوتی كوردستانی لەڕێگەی بەندەری جەیهانەوە باسكردووە.

ئەوەی لەبارەیەوە دەوترێت: مەسرور بارزانی، سەرۆكوەزیرانی هەرێمی كوردستان ڕایگەیاند، "لەگەڵ وەزیری وزەو سەرچاوە سرووشتییەکانی تورکیا هاوڕا بووین لەسەر نەهێشتنی هەموو ئاستەنگ و بەربەستەکانی بەردەم هەناردەکردنەوەی نەوتی هەرێمی کوردستان لە ڕێگەی بەندەری جەیهان لە زووترین کاتدا."

لە لایەكی دیكەوە: بەر لە سەردانەكەی بۆ هەولێر، وەزیری وزەی توركیا لەگەڵ هەریەک لە سەرۆكوەزیران و وەزیرانی دەرەوە و نەوت و كارەبای عێراق و بەڕێوەبەری كۆمپانیای سۆمۆ کۆبووەوە، یەكێك لە تەوەرە گرنگەكانی كۆبوونەوەكانیش؛ پرسی هەناردەكردنەوەی نەوتی هەرێمی كوردستان بووە.

ڕاگەیێنراوی فەرمی: لەمبارەیەوە نووسینگەی ڕاگەیاندنی سەرۆكوەزیرانی عێراق دەڵێت،"بۆ چارەسەركردنی كێشە تەكنیكییەكانی هەناردەكردنەوەی نەوتی هەرێمی كوردستان، دانووستان لەگەڵ كۆمپانیا بیانییەكانی بەرهەمهێنانی نەوت كە گرێبەستیان لەگەڵ حكومەتی هەرێمی كوردستان هەیە، بەردەوامە."

لێدوانی فەرمی: وەزیری وزەی توركیا لەبارەی سەردانەكەی بۆ هەرێمی كوردستان و بەغدا، لە ئەژماری فەرمی خۆی لە تۆڕی 'ئێكس' پەیامێكی بڵاوكردووەتەوە و ڕایگەیاند، "لەكۆبوونەوەكانماندا، هەنگاوەكانی گەشەپێدانی بازرگانیی نەوت و كارەبامان تاوتوێ كردووە، هاوكات لەبارەی ئاسایشی گواستنەوەی نەوت گفتوگۆمان كردووە."

باكگراوند: دوای هەمواری ماددەی 12 لە یاسای بودجە، هێشتا ئاستەنگەکانی بەردەم هەناردەکردنەوەی نەوتی کوردستان ماون و چاوەڕێ دەکرێت بەمنزیکانە گرفتەکان کۆتاییان بێت.