كۆميسیۆن هۆشداری بەو حیزبانە دەدات كە كۆنگرەیان نەبەستووە

ئاڤا نیوز

کۆميسیۆنی ھەڵبژاردنەکانی عێراق بۆ بەڕێوەبردنی ھەڵبژاردنی پەرلەمانی کوردستان، لیژنەیەکی ناوەندی پێکھێنا و ھۆشداریش بەو حزبانە دەدات کە ماوەیان بەسەرچووە و کۆنگرەیان نەبەستووە. 

لێدوانی فەرمی: ئەنجوومەنی کۆمیسیاران بڕیاریدا بە پێکھێنانی لیژنەیەکی ناوەندی بۆ بەڕێوەبردنی ھەڵبژاردنی پەرلەمانی کوردستان و لیژنەکە لە سەرۆکی فەرمانگەی کۆمسیۆن، بەڕێوەبەرانی کاروباری یاسایی، ھونەری و دارایی  پێکهاتووە. جومانە غەلای، گوتەبێژی کۆمیسیۆنی باڵای سەربەخۆی ھەڵبژاردنەکانی عێراق  وای بە ئاڤا نیوز گوت.

بۆچی گرنگە: ئەرکی لیژنەکە جێبەجێکردنی ھەموو ئەو ڕێکار و بڕیار و ڕاسپاردانە دەبێت کە ئەنجوومەنی کۆمیسیاران تایبەت بە ھەڵبژاردنی پەرلەمانی کوردستان دەری دەکات.

شێوازی جێبەجێکردن: بەگوێرەی پەیڕەوی ناوخۆ ھەموو حیزبێک لەماوەیەکی دیاریکراودا دەبێت کۆنگرە ببەستێت و سەرکردایەتیی نوێ ھەڵبژێرێت.