کەشتی سێبەر هەزاران بەرمیل نەوتی ئێران دەگوازێتەوە بۆ بازاڕی نێودەوڵەتی

ئاڤا نیوز

بەگوێرەی نوێترین ڕاپۆرتی ئەمریکی کە لەماوەی چەند مانگی ڕابردوودا ئامادەکراوە، ئێران ڕۆژانە نزیکەی ملیۆنێک و 500 هەزار بەرمیل نەوتی بەقاچاخ هەناردە کردووە بۆ بازاڕی نێودەوڵەتیی و بەشێکیشی لە ڕێگەی عێراقەوە بوو. 

 

وێنە گەورەکە: بە ئامانجی تووندکردنەوەی گەمارۆکانی سەر ئێران، ئیدارەی نوێی ئەمریکا گوشاری خستووەتە سەر ئەو وڵاتە بۆ ڕێگری لە گواستنەوەی نەوت و بەرهەمە نەوتییەکانی تاوەکو لە ڕێگەیەوە داهاتی دەست نەکەوێت. 

 

زانیاریی بەدەستهاتوو: ئەمریکا لە ڕاپۆرتێکدا وردەکاری کەشتی سێبەری ئێرانی بڵاوکردووەتەوە کە تاران ڕۆژانە ڕۆژانە نزیکەی ملیۆنێک و 500 هەزار بەرمیل نەوت لە دەرەوەی چاودێری نێودەوڵەتیی لە ڕێگەی چەند کەشتییەک دەگوازێتەوە بۆ بازاڕەکانی جیهان. 

 

زانیاریی زیاتر: بەپێی زانیاریی ناو ڕاپۆرتەکە بەشێک لەو نەوتەی لە ڕێگەی عێراقەوە دەگوازرێتەوە دەگاتە بازاڕەکانی جیهان و داهاتەکەی دەگاتەوە دەستی ئێران. 

 

باکگراوند: ئەمریکا سزای نوێی بەسەر 19 کۆمپانیا و 13 کەشتی وڵاتانی سەنگافورە، جەزائیر، چین، بەنگلادیش و سریلانکادا سەپاند، کە بە بازرگانیکردن بە نەوتی ئێرانەوە تێوەگلاون.