ڕوونکردنەوە لەبارەی زیادکردنی مووچەی لیواکانی نەوت و گاز دەدرێت

ئاڤا نیوز

 

دوای ئەوەی دەنگۆی زیادکردنی مووچەی کارمەندانی هێزەکانی نەوت و گازی سەر بە وەزارەتی ناوخۆ بڵاوبوەوە، لیوای یەکی پاراستنی دامەزراوە نەوتیەکان ڕاستی بابەتەکە بۆ ئاڤا میدیا ئاشکرا دەکات.

 

چیرۆکی سەرەکی: سەدان کارمەندی هێزەکانی نەوت و گازی سەر بە وەزارەتی ناوخۆ، لەڕێگەی هەژماری من مووچەکانیان وەرگرتووە و بڕی 75 هەزار دینار لە مووچەکەیان زیاتر بووە کە بە هەڵە خراوەتە سەر هەژمارەکانیان، ئێستاش داوا لەو کارمەندانە دەکرێت بڕە پارە زیادەکە بگەڕێننەوە.

 

لێدوانی فەرمی: لیوا سەردار مورتکە، فەرماندەی لیوای یەکی پاراستنی دامەزراوە نەوتیەکان بە ئاڤا میدیای ڕاگەیاند: مانگانە بڕی 75 هەزار دینار لە هەر کەسێک دەگەڕێندرتێتەوە بۆ نەسریەی خۆراک، ئەم مانگە پارەکە نەگەڕێندراوەتەوە و چووەتە سەر هەژماری بانکی ئەو کارمەندانە.

 

زانیاریی زیاتر: لیوا سەردار مۆرتکە ئەوەشی بە ئاڤا گوت، بڕە پارەکە، زیادبوونی مووچە نییە و پارەکە بە هەڵە چووەتە سەر هەژماری کارمەندەکان". ئەو دەشڵێت، "پارەکە لەلایەن بەڕێوەبەرایەتیی ژمێریاری گشتی بۆ دابینکردنی ئازوقە لە کارمەندەکان دەگەڕێندرێتەوە و گەڕاندنەوەی ئەم بڕە پارەیە سیستمە و لە هەموو بنکە سەربازییەکان هەیە".