بانکی خوێنی هەولێر پێشکەوتووترین سیستم پەیڕەو دەکات

ئاڤا نیوز

 

لە هەولێر پێشکەوتووترین سیستمی وەرگرتن و گواستنەوەی خوێن پەیڕەو دەکرێت، سیستمەکە لەسەر ئاستی کوردستان و عێراق هاوشێوەی نییە، هەر لە ئێستاوە بووەتە جێگەی سەرنجی حکومەتی عێراق. 

وێنە گەورەکە: بانکی خوێنی هەولێر، ئەم سیستمە پێشکەوتووەیان بۆ وەرگرتنی خوێن و بەخشینی خوێن بە نەخۆشان و تووشبووانی تالاسیما هێناوە، ناوی "بڵەد بانک سیستمە، هەم نەخۆش و تووشبووانی تالاسیما، هەم خوێنەکە پارێزراو ئەبێت.

لێدوانی فەرمی: د. سانع ئەرگۆشی، بەڕێوەبەری بانکی خوێنی هەولێر بۆ ئاڤا دەڵێت، 40 نەخۆشخانەی حکومی و ئەهلی هەولێریان لەڕێگەی سیستمەکەوە بە بانکی خوێنەوە بەستووەتەوە، لەڕێگەیەوە خوێن بۆ تەواوی نەخۆشخانەکان دابین دەکەن بەپێی پێویستی و بە شێوازێکی زۆر تەندروست.

 

ئەوەی پێویستە بیزانیت: د. سانع ئەرگۆشی دەشڵێت: هەفتانە بڕی ئەو خوێنە بۆ نەخۆشخانەکان دابین دەکەین کە پێویستیانە.

-سیستمەکە لەسەر ئاستی عێراق هاوشێوەی نییە.
-چیتر کەسوکاری نەخۆشەکان ناتوانن بە ساردکەرەوەی گەڕۆک خوێن بۆ نەخۆشەکانیان ببەن.
-سیستمەکە ڕۆتیناتی کاغەزی و هێنان و بردنی خوێن لەلایەن کەسوکاری نەخۆشەوە ناهێڵێت.
-خوێن بە شێوازێکی دروست بۆ نەخۆش و نەخۆشخانەکان دەگوازرێتەوە.
-هەر کەسێک لە بانکەکە خوێن ببەخشێت، ئەکاونتی بۆ دەکرێتەوە و سیستمەکە ژمارەی ئەو بووتڵە خوینانە هەژمار دەکات کە بەخشیویەتی.
-لەسەر هەر بووتڵێکی خوێن دەنووسرێت بە کەڵکی کام تووشبووی تالاسیما دێت.
- ئەو خوێنەی لە هاووڵاتییان وەردەگیرێت، بارکۆدی خۆی لەسەر دەبێت و ماوەی بەسەرچوونەکەی دەستنیشان دەکرێت.
-هەندێکجار خوێن بۆ سلێمانی، دهۆک، کۆیە و ئاکرێ دابین دەکەین.
-بانکی خوێنەکانی بەغدا و مووسڵ نوێنەرەکانیان ناردووەتە بانکی خوێنی هەولێر و دەیانەوێت سوود لە سیستمەکە وەربگرن.

 

زانیاریی زیاتر: بانکی خوێنی هەولێر بڕوانامەی 15189 لە بواری پشکنینی ڤایرۆسات وەردەگرێت، کە مەبەست لێی دڵنیابوونە لەوەی خوێن بەشێوەیەکی سەلامەت بە  نەخۆشەکان دەگات.

 

ئەمەش بزانە: ماوەی بەسەرچوونی پێکهاتەکانی خوێن بەمشێوەیەن: 

-پلازمای خوێن بە ساڵێک بەسەردەچێت.
-خڕۆکە سوورەکان 36 تاوەکو 42 ڕۆژە.
-خەپلەکانی خوێن بە شەش ڕۆژ.