ترەمپ هەوڵی گەڕاندنەوەی منداڵە ڕفێندراوەکانی ئۆکراینا دەدات

ئاڤا نیوز

دوای ئەوەی ئیدارەی ترەمپ کۆتایی بە بەدواداچوونی منداڵە ڕفێنراوەکانی ئۆکرانیا لە ڕووسیا هێنا، بەڵێنیدا یارمەتی کیێڤ بدات بۆ وەرگرتنەوەی هەزاران منداڵی ئۆکراینی.

وێنە گەورەکە: جەنگی سێ ساڵەی نێوان ڕووسیا و ئۆکراینا بووەتە هۆی وێرانکارییەکی زۆر، جیا لە کوژرانی هەزاران سەرباز و کەسی مەدەنی، بووەتە هۆکار بۆ بێسەرشوێن بوونی ژمارەیەکی زۆری منداڵانی ئۆکراینی، کە دەگوترێت لەلایەن ڕووسیا ڕفێندرابن.

لێدوانی فەرمی: مارکۆ ڕوبیۆ، وەزیری دەرەوەی ئەمریکا و مایک والتز، ڕاوێژکاری ئاسایشی نیشتمانی کۆشکی سپی لە ڕاگەیێنراوێکی هاوبەشدا ڕایانگەیاند، ترەمپ لە ڕێگەی تەلەفۆنەوە لەگەڵ ڤۆلۆدیمیر زێلێنسکی، هاوتا ئۆکراینییەکەی، ئەو پرسەیان تاوتوێ کردووە، لە نزیکەوە لەگەڵ مۆسکۆ و کێیڤ کاردەکات بۆ دڵنیابوون لە گەڕانەوەی منداڵەکان.

بۆچی گرنگە: لەگەڵ دەستبەکاربوونی دۆناڵد ترەمپ وەک سەرۆکی ئەمریکا، هەوڵەکانی خستەگەڕ بۆ کۆتاییهێنان بەم شەڕە، دوای ڕاگەیاندنی پێشنیازی ئاگربەست بۆ ماوەی 30 ڕۆژ،  لەیەک هەفتەدا پەیوەندی تەلەفۆنی لەگەڵ هەر یەکە لە سەرۆکی ڕووسیا و ئۆکراینا ئەنجامدا، پرسی ڕاگرتنی شەڕ بابەتی سەرەکی گفتۆگۆیەکان بوو.