لە سەیدسادق گەنجێک پێنج ئەندامی خێزانەکەی دەکوژێت و دواتریش خۆی دەکوژێت

 

ئاڤا نیوز

لە قەزای سەیدسادق شەش کەسی خێزانێک کوژران، وتەبێژی پۆلسی سلێمانی لەوبارەیەوە دەڵیت بەڵگە سەرەتاییەکان دەریدەخەن بکوژ نەخۆشی دەروونی هەیە و 'لێکۆڵینەوە لە ڕووداوەکە بەردەوامە'.

چیرۆکی سەرەکی: شەوی چوارشەممە، لە گوندی گرێزەی سەربە قەزای سەید سادق، کەسێک بەناوی بەشیر سالار کە لە ئەورووپا گەڕاوەتەوە، بە چەکی کڵاشینکۆف پێنج ئەندامی خێزانەکەی دەکوژێت، کە پێکهاتوون لە، باوکی، دایکی، دوو برا، خوشکێکی دواتریش خۆی دەکوژێت.

لێدوانی فەرمی: سەرکەوت ئەحمەد، وتەبێژی پۆلیسی سلێمانی بە ئاڤای ڕایگەیاند: وەک دەگوترێت گەنجەکە باری دەروونی تەواو نەبووە، بەڵام دەبێت بەڵگەیەکی پزیشکی هەبێت ئەوە بسەلمێنێت، بۆیە لێکۆڵینەوە لە ڕووداوەکە بەردەوامە.

وتەبێژی پۆلیسی سلێمانی وتیشی: کامێراکانی سنوورەکە کۆکراوەتەوە و بە ڕوونی ڕووداوەکە دیارە، هەموو زانیارییەکان کۆکراونەتەوە و ئەمڕۆ دەخرێتە بەردەستی دادوەری لێکۆڵینەوە.

ئەوەی پێویستە بیزانیت: بەڕێوەبەرایەتی گشتیی کارەبای سلێمانی ڕایگەیاند: سالار محەممەد گرێزەی سەرۆکی ئەو خێزانەی لەلایەن کوڕێکیەوە کۆمەڵکوژکران، فەرمانبەرە لە هۆبەی چاکسازی کارەبای 1ـی بەڕێوەبەرایەتی دابەشکردنی کارەبای سەیدسادقە.