لە بەسرە کەسێک کە خۆی بە پزیشک ناساندووە دەستگیر دەکرێت

ئاڤا نیوز

لە شاری بەسڕەی باشووری عێراق کەسێک دەستگیرکرا کە لە سەنتەرێکی پزیشکی بێ مۆڵەتدا خۆی بەپزیشک ناساندووە و چارەسەری بە نەخۆش داوە، بەوەش مەترسی لەسەر گیانی ئەو نەخۆشانە دروستکردووە کە سەردانیان کردووە.

بۆچی گرنگە: پیشەی پزیشکی هاوشێوەی پیشەکانی دیکە پێویستی بە ساڵانێک خوێندن و فێربوون و لەکۆتاییشدا مۆڵەت و ڕێگەپێدانی فەرمی هەیە، بەپێچەوانەوە گیانی هاووڵاتییان و تەندروستییان دەخاتە مەترسییەوە.

لێدوانی فەرمی: سەرچاوەیەکی ئەمنیی بە ئاڤا میدیای ڕاگەیاند، ئەو کەسە بانگەشەی ئەوەی کردووە کە ئەو پزیشکی پسپۆڕە لە نەخۆشییەکانی جومگە و بڕبڕەی پشت، بە کرداریش پێشوازیی لە نەخۆش کردووە و ناوی هەندێک دەرمانیی بۆ نوسیوون کە هەر نازانرێت دەرمانن یاخود نا.

ئاماژەی بەوەشکرد، دەرکەوتووە کە ئەو کەسە دەرمانی گومانلێکراوی داوە بە خەڵک کە لەڕووی پزیشکییەوە بەکارهێنانیان پشتڕاستنەکراوەتەوە، ئەوەش مەترسی لەسەر گیانی نەخۆشەکان دروستکردووە.