لە هەولێر 14 تیم چاودێری ڕۆژانی پشووی نەورۆز دەکەن

ئاڤا نیوز

بەڕێوەبەرایەتیی تەندروستی هەولێر، پلانی ڕۆژانى پشووى جه‌ژنى نه‌ورۆزى بڵاوکردەوە، له‌ناو سه‌نته‌ری شار‌ و ده‌ره‌وه‌ی شار تیمەکان ئامادەن بۆ خزمەتی هاونیشتمانیان، هاوکات نه‌خۆشخانه‌كانى فریاكه‌وتن و بانكی خوێنیش كراوه‌ ده‌بن.

 

وێنە گەورەکە: جەژنی نەتەوەیی کورد و سەری ساڵی کورد لە هەرێمی کوردستان پشووی فەرمییە لەسەرجەم دام و دەزگاکان، هاووڵاتیان و گەشتیاران بەشداریی لە ئاهەنگەکانی نەورۆز دەکەن، بەوبۆنەیەوە تیمەکانی تەندروستی لەسەرجەم ناوچەکان لە ئامادەباشی دەبەن بۆ خزمەتی هاووڵاتییان، هاوکات بۆ ئەمساڵیش 14 تیم لەناو شار و دەورووبەری لە ئامادە باشیدان.

 

ڕاگەیێنراوی فەرمی: بەڕێوەبەرایەتیی گشتیی تەندروستی هەولێر ڕایگەیاند، لیژنەیەک پێکهێنراوە بۆ بەداواداچوون و چاودێریکردنی ناوه‌نده‌ تەندروستییه‌كان لە ڕۆژانی پشووی جەژنی نەورۆز بۆئه‌وه‌ى خزمەتگوزارییە پزیشکییە تەندروستیەکان بەردەوام بێت، نەخۆشخانەی فریاکەوتن بەردەوام لە ئەرکدا دەبن بۆ پێشوازی لە چارەخوازان.

 

زانیاریی زیاتر: سەنتەری هەماهەنگی فریاکەوتن 122 بەردەوام 24 کاتژمێر لەسەر هێڵ دەبن بۆ گەیاندنی تیمی پزیشکی بەهاناوەچوون بۆ هەر حاڵەتێک کە پێویستی بە تیمی پزیشکی هەبێت، هاوکات سەنتەری بانکی خوێن بەشێوەی ئێشکگری 24 کاتژمێر لە ئەرکدا دەبن.

 

ئەوەی پێویستە بیزانیت:  تیمەکانی فریاگوزاریی خێرا لەم شوێنانەش ئامادە دەبن:-

-     له‌ بازگەی هەولێر.
-     هاوینەهەواری هەنارە.
-     هاوینەهەواری دڵۆپە.
-     بنکەی فریاگوزاری شێراوە.
-     سنووری ناحیەی مه‌خمور.
-     پارکی شەهید سامی عه‌بدولڕەحمان.
-     هاوینەهەواری شێخ توڕاب.
-     پارکی شانەدەر، بنکەی فریاگوزاری خانزاد.
-    هاوینەهەواری دووین و ناوشاریش چوار تیمى بۆ ئاماده‌كراوه‌.