فایلی خەڵک؛ ئاڤا هاوکار دەبێت بۆ چارەسەرکردنی کێشەی کارگوزارێکی سەیدسادق

 

ئاڤا نیوز

دوای سێ هەفتە لە بەدواداچوونی ورد بۆ کەیسی خانەنشینکردنی کارگوزارێکی سەیدسادق، ئاڤا هۆکاری ڕاگرتنی مامەڵەکەی ئاشکرا دەکات و ڕێکارەکانی چارەسەرکردنی بۆ ئاشکرا دەکات.

 

چیرۆکی سەرەکی: کەژاڵ محەممەد ئەحمەد کە پیشەی کارگوزارە لەسەر میلاکی پەروەردەی سەیدسادق، دوای ئەوەی جەڵدە لێی دەدات و توانای کارکردنی نامێنێت، داوای خانەنشینکردنی دەکات، بەڕێوەبەرایەتیی گشتیی پەروەردەی سلێمانیش داوا دەکات کاری پێویست لەسەر داواکارییەکە بکەن.

لێدوانی فەرمی: د.سامان سیوەیلی، وتەبێژی وەزارەتی پەروەردە، بە ئاڤا میدیای ڕاگەیاند: ئەم نووسراوە ڕۆژی 2025-03-19، وەزیری پەروەردە ڕەزامەندی لەسەردا و ڕۆژی 2025-03-20، بۆ وەزارەتی تەندروستی ڕەوانە کرا، ئەوانیش بۆ لیژنەی ئیستنافی دەنێرن، کە پەسەندیان کرد و بۆیان ناردینەوە، ئێمەش بۆ وەزارەتی دارایی و ئابووری دەنێرین تاوەکو خانەنشین بکرێت.

 

زانیاریی زیاتر: بەوتەی سامان سیوەیلی، هۆکاری ڕایینەکردنی مامەڵەی کەژاڵ محەممەد لە مانگی 11ـی ساڵی 2024دا، بۆ ئەوە دەگەڕێتەوە کە وەزارەتی دارایی و بەڕێوەبەرایەتیی گشتیی خانەنشینی هەموو مامەڵەیەکی خانەنشینیان ڕاگرتبوو، پێیان وتبووین کە چاوەڕێی ڕێنمایی نوێبن، ئەوەبوو لە سەرەتای ئەمساڵەوە ڕێنمایی نوێی خانەنشینی دەرچوو، ئەویش بۆ چوار تەمەنبوو و ئەولەویەتیش هەر بۆ ئەو چوار تەمەنە بوو.

لە لایەکی دیکەوە: د.مەعاف عەبدوڵڵا، بەڕێوەبەری گشتیی کارگێڕی و دارایی وەزارەتی تەندروستی، بە ئاڤا میدیای ڕاگەیاند: ڕۆژی پێنجشەممە 2025-03-20، بە پۆستە نووسراوەکەی وەزارەتی پەروەردەمان پێگەیشت و ئاراستەی بەرپرسی لیژنەی پزیشکی ئیستنافیمان کرد، لیژنەکەمان ڕاسپاردووە لەم هەفتەیە ڕۆژێک بۆ پشکنینی ئەم خاتوونە دیاری بکەن، بۆ ئەوەی لە زووترین کات کارەکانی ڕایی بکرێت.