سەرۆکوەزیرانی کەنەدا: ڕێگە نادەین ترەمپ لەناومان ببات

 

ئاڤا نیوز

سەرۆک وەزیرانی نوێی کەنەدا داوا دەکات هەڵبژاردنی پێشوەختەی وڵاتەکەی لە 28ـی نیسان بکرێت و بەڵێنی دا کە هەوڵەکانی دۆناڵد ترەمپ بۆ لکاندنی وڵاتەکەی بە ئەمریکا لەناوببات.

 

چیرۆکی سەرەکی: بەهۆی هەڕەشەکانی ترەمپەوە، سەرۆکوەزیرانی کەنەدا چەند مانگێک هەڵبژاردنی پەرلەمانی وڵاتەکەی هێنایە پێشەوە کە بڕیار بوو لە مانگی 10ـی ئەمساڵ ئەنجام بدرێت.

لێدوانی فەرمی: مارک کارنی، سەرۆکوەزیرانی کەنەدا ڕایگەیاند، دۆناڵد ترەمپ دەیەوێت لەناومان ببات بۆ ئەوەی ئەمریکا بتوانێت خاوەنی ئێمە بێت، بەڵام ڕێگەی پێنادەین ئەو کارە بکات.

هەڵبژاردنی پێشوەختە لە 28ـی نیسان بەڕێوەدەچێت و داوا لە هاوڵاتیانی کەنەدا دەکەم کاندیدێکی بەهێز بۆ ڕووبەڕووبوونەوەی ترەمپ هەڵبژێرن.

ئەوەی پێویستە بیزانیت: لیبراڵەکانی کەنەدا بۆ ماوەی دە ساڵە لە دەسەڵاتدان، ئێستا ئاستی جەماوەرییان کەمیکردووە، بەڵام مارک کارنی، سەرۆکوەزیرانی ئێستای کەنەدا هەوڵ دەدات بەهۆی شەپۆلی نیشتمانپەروەری کەنەدییەکان بەرامبەر هەوڵی ترەمپ بۆ لکاندنی وڵاتەکەیان بە ئەمریکاوە زۆرینەی دەنگەکان لە هەڵبژاردنی پەرلەمان بەدەستبهێنێت.

ئەوەش بزانە: ترەمپ کەنەدییەکان توڕەدەکات و چەندین جارە سەروەری و سنوورەکانی ئەو وڵاتە بە دروستکراو ناودەهێنێت و داوایان لێدەکات ببنە ویلایەتی 51ــەمینی ئەمریکا.