بەتۆمەتی سووکایەتیکردن بە دایکی ئەردۆغان 41 کەس دەستگیر دەکرێن

ئاڤا نیوز

 

لە ئەنجامی بەڕێوەچوونی ژمارەیەک گردبوونەوە و چالاکی گەنجان لە تورکیا، گرژی و ئاڵۆزی لەنێوان خۆپیشاندەران و پۆلیس دروستبوو، بەشێک لەو گەنجانە گوتافی 'دژ بە ئەردۆغان و دایکی کۆچکردوویان' دەگوتەوە بەهۆیەوە تاوەکو ئێستا 41 کەس دەستگیر کراون. 

 

وێنە گەورەکە: ماوەی چەند ڕۆژێکە لە تورکیا خۆپیشاندان و گردبوونەوە دژی بڕیاری دەستگیرکردنی ئەکرەم ئیمام ئۆغلو لە ئیستەنبووڵ بەڕێوەدەچێت بەهۆیەوە گرژی و ئاڵۆزی دروستبووە و چەندین کەسیش دەستگیر کراون.

 

زانیاریی بەدەستهاتوو: دەستگیرکردنی ئەو ژمارە گەنجانە لەلایەن وەزارەتی ناوخۆی تورکیا دوای ئەوەدێت، گرتە ڤیدیۆییەک لە تۆڕە کۆمەڵایەتییەکان بڵاوبووەتەوە کە گوتاف دژی ئەردۆغان و دایکی کۆچکردووی دەگوترێتەوە. 

 

لێدوانی فەرمی: لە کاردانەوەی بڵاوبوونەوەی ئەو گرتە ڤیدیۆییە، ئۆزگور ئۆزێل، سەرۆکی جەهەپە ڕایگەیاند: ئەو بێڕێزییە بەهیچ شێوەیەک قبووڵ ناکەم، وای دادەنێم ئەو جوێنانە بە دایکی خۆم دراوە.

 

ئەکرەم ئیمام ئۆغلو، سەرۆکی دەستبەسەرکراوی گەورە شارەوانی ئیستەنبووڵ لەوبارەیەوە دەڵێت، لە ناخی دڵمەوە ئەو کردەوەیە سەرکۆنە دەکەم، هەروەها داوا دەکات داواکاری گشتیی ڕێوشوێنی ئەمنی دژی ئەو کەسانە بگرێتە بەر.

 

 هاکان فیدان، وەزیری دەرەوەی تورکیا باسی لەوە کردووە، ئەو کەسانەی ئەو بێ ئەدەبییەیان بەرامبەر بە دایکی کۆچکردووی سەرۆکەکەمان کردووە لەبەردەم دادگە باجی ئەو کارەیان دەدەن.