ئەردۆغان سەردانی ئەمریکا دەکات و لەگەڵ ترەمپ کۆدەبێتەوە

ئاڤا نیوز

 

بڕیار وایە ڕەجەب تەیب ئەردۆغان، سەرۆککۆماری تورکیا سەردانی واشنتن بکات و لەگەڵ دۆناڵد ترەمپ، سەرۆکی ئەمریکا کۆببێتەوە.

 

وێنە گەورەکە: ئەمڕۆ چوارشەممە لە واشنتن لە پەراوێزی سەردانەکەی هاکان فیدان، وەزیری دەرەوەی تورکیا بۆ ئەمریکا، هەریەک لە ئاکیف چەتای کڵج، ڕاوێژکاری سەرۆککۆماری تورکیا بۆ  سیاسەتی دەرەوە و ئاسایش لەگەڵ مایک واڵتز، ڕاوێژکاری ئاسایشی نیشتمانیی ئەمریکا کۆبوونەوەیەکیان ئەنجامدا و کۆمەڵیک پرسی گرنگ و پەیوەست بە ئاسایش و پەیوەندیەکانی نێوان هەردوو وڵات گفتووگۆی لەبارەوە کرا.

 

بڵاوکراوەی فەرمی: بەپێی بڵاوکراوە فەرمیەکانی تورکیا لە کۆبوونەوەی ئاکیف چەتای کڵج، ڕاوێژکاری سەرۆککۆماری تورکیا بۆ  سیاسەتی دەرەوە و ئاسایش لەگەڵ مایک واڵتز، ڕاوێژکاری ئاسایشی نیشتمانی ئەمریکا، ئامادەکارییەکان بۆ کۆبوونەوەی نێوان ڕەجەب تەیب ئەردۆغان، سەرۆککۆماری تورکیا و دۆناڵد ترەمپ، سەرۆکی ئەمریکا پرسی سەرەکی گفتووگۆکان بووە و چاوەڕوان دەکرێت لە ماوەیەکی نزیکدا ئەردۆغان سەردانی واشنتن بکات.

 

زانیاریی زیاتر: ئاسایشی ڕۆژهەڵاتی ناوەڕاست و ناتۆ و کاری هاوبەشی نێوان هەردوو دەوڵەت لە بابەتە سەرەکییەکانی کۆبوونەوەی نێوان ڕاوێژکاری سەرۆککۆماری تورکیا و ڕاوێژکاری ئاسایشی نیشتمانیی ئەمریکا بوون و گفتووگۆیان لەبارەوە کرا.

 

ئەوەی پێویستە بیزانیت: هاکان فیدان، وەزیری دەرەوەی تورکیا سەرۆکایەتیی شاندەکەی تورکیا دەکات بۆ ئەمریکا و لە ماوەی سەردانە دوو ڕۆژیەکەدا کۆبوونەوەکان لەگەڵ مارکۆ ڕۆبیۆ، وەزیری دەرەوەی ئەمریکا و بەرپرسانی ئەمریکی پەیوەست بە کاروباری ئاسایش و سیاسەتی دەرەوە مەبەستی سەرەکی سەردانی وەفدەکەی تورکیایە.