ڕێککەوتنی حکومەتی عێراق و BP بۆ پەرەپێدانی کێڵگە نەوتییەکانی کەرکووک واژۆ دەکرێت

 

ئاڤا نیوز

بە چاودێریی سەرۆکوەزیرانی عێراق، ڕێککەوتنی وەزارەتی نەوت و کۆمپانیای بریتیش پیترۆلیۆم (BP) بۆ پەرەپێدانی کێڵگە نەوتییەکانی کەرکووک واژۆکرا، بەگوێرەی ڕێککەوتنەکەش هەناردەی نەوتی کەرکووک بۆ 420 هەزار بەرمیل بەرزدەکرێتەوە.

چیرۆکی سەرەکی: 18ـی ئەم مانگە ئەنجوومەنی وەزیرانی عێراق ڕەشنووسی ڕێککەوتنی وەزارەتی نەوتی فیدڕاڵ و کۆمپانیای بریتش پترۆڵیۆم BPـی بۆ پەرەپێدانی کێڵگە نەوتییەکانی پارێزگای کەرکووک پەسەند کرد.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاویکردەوە، بەمەبەستی نۆژەنکردنەوە و زیادکردنی بەرهەمهێنانی نەوت لە کێڵگەکانی قوبەی بابا ‌و بای حەسەن و جمبور و ‌خەباز و وەبەرهێنان لە کەرتی غاز و گەڕان بەدوای بیرەنەوتی نوێدا، ئەمڕۆ بە چاودێریی محەممەد شیاع سوودانی، سەرۆکوەزیران وەزارەتی نەوتی فیدڕاڵ و  کۆمپانیای بریتش پترۆڵیۆم BPـی بەریتانی ڕێککەوتنیان واژۆکرد.

بەگوێرەی ڕێککەوتنەکە:

٠ پەرەپێدانی ئەو چوار کێڵگەیە سامانی هایدرۆکاربۆنی زیاد دەکات.

٠ تێکڕای بەرهەمهێنانی نەوتی خاو لە کەرکووک بۆ ڕۆژانە 420 هەزار بەرمیل بەرزدەکرێتەوە .

٠ ئاستی بەرهەمهێنانی غاز لە کۆمپانیای غازی باکوور دەگەیێنرێتە 400 ملیۆن پێ سێجا لە ڕۆژێکدا.

٠ وێستگەیەکی بەرهەمهێنانی کارەبا بە توانای 400 مێگاوات دروستدەکرێت.

٠ پڕۆژەکە هاوکار دەبێت بۆ ڕاگرتنی سووتانی ئەو غازە لەگەڵ بەرهەمهێنانی نەوت دەسوتێت، ئەو غازەش لە دابینکردنی وزەدا بۆ بەرهەمهێنانی کارەبا سوودی لێوەردەگیرێت.

٠ ڕێککەوتنەکە هەلی کار دابین دەکات و کادری لێهاتوو لەبواری هونەری و ئەندازیارییدا پێدەگەیێنێت.