ئەم مانگە 313 هەزار كەس لەڕێگەی هەژماری منەوە مووچە وەردەگرن

ئاڤا نیوز

تیمی پڕۆژەی هەژماری من نوێترین داتا و زانیارییان سەبارەت بە پڕۆژەكە بڵاوكردەوە و ئاشكرای دەكات، بۆ مووچەی مانگی سێ 313 هەزار مووچەخۆر لەڕێگەی هەژماری منەوە مووچە وەردەگرن.

وێنە گەورەکە: بە ئامانجی هێنانەکایەی ئاسانکاریی زیاتر بۆ هاووڵاتییانی هەرێمی کوردستان، حکومەت بەردەوامە لە پتەوکردنی ژێرخانی بە دیجیتاڵکردن و لەو چوارچێوەیەشدا دەیەوێت سەرجەم مووچەخۆران لە ڕێگەی هەژماری منەوە مووچەکانیان وەربگرن و تا ئێستا پرۆسەکە لەکەرتی گشتیی بەردەوامە و دوای ئەوە کەرتی تایبەتیش دەگرێتەوە.

بڵاوكراوەی فەرمی: تیمی هەژماری من ڕایگەیاند: لە سەرجەمی یەك ملیۆن سوودمەند تاوەكو ئێستا 732 هەزار فەرمانبەر و مووچەخۆر لە پڕۆژەی هەژماری من تۆمار كراون، 405 كارتی بانك دابەش كراون و  ئەم مانگە 313 هەزار مووچەخۆر مووچەكانیان لەڕێی پڕۆژەی هەژماری منەوە وەردەگرن.

زانیاریی زیاتر: تاوەكو ئێستا 550 ئەی تی ئێم  لە 200 شوێنی جیا جیای سەرتاسەری هەرێمی كوردستان دانراون.

ئەمەش بزانە: بەپێی داتاكان، لەو 313 هەزار كەسەی ئەم مانگە مووچەیان لەڕێی هەژماری منەوە وەردەگرن 228 هەزار و 700 كەسیان فەرمانبەری مەدەنین، 84 هەزار و 600یشیان سەربازین.