ئاگادارییەک لە حکومەتەوە بۆ 313 هەزار مووچەخۆر

ئاڤا نیوز

تیمی هەژماری من مووچەخۆران ئاگادار دەکاتەوە سەردانی ئەی تی ئێمەکان نەکەن بۆ ڕاکێشانی مووچە تاوەکو کورتەنامەیان پێدەگات.

چیرۆکی سەرەکی: سبەی پێنجشەممە دەست بە دابەشکردنی مووچەی مانگی سێ دەکرێت و سێ ڕۆژ بەردەوام دەبێت، ئەم مانگەش 313 هەزار مووچەخۆر لەڕێگەی هەژماری من مووچە وەردەگرن.

ئەوەی پێویستە بیزانیت: وەزارەتی دارایی و ئابووریی هەرێمی کوردستان  و تیمی هەژماری من لە دوو ڕاگەیێنراوی جیاوازدا بڵاویان کردووەتەوە؛ ڕاستەوخۆ پارە ئەخرێتە سەر هەژماری سوودمەندبووانی هەژماری من و کاتژمێر 08:00ی بەیانی سبەی پێنجشەممەش مووچەی بەشێکیان بەردەست دەبێت.

ئاگاداری فەرمی: تیمی سەرپەرشتیکردنی هەژماری من بە ئاڤایان گوت: بەش بەش پارە دەخرێتە سەر هەژماری مووچەخۆران، پێویست ناکات هیچ مووچەخۆرێک سەردانی ئەی تی ئێمەکان بکات تاوەکو لەڕێگەی مۆبایلەکەیەوە کورتەنامەی بەدەست نەگات.

هۆکارە زانراوەکان: هۆکاری ئەوەی پارەی سەرجەم مووچەخۆران بەیەکەوە ناخرێتە سەر هەژمارەکانیان کەمی ئەی تی ئێمەکانە، تاوەكو ئێستا تەنیا 550 ئەی تی ئێم  لە 200 شوێنی جیاجیای هەرێمی كوردستان دانراون، واتا هەر 569 مووچەخۆر ئەی تی ئێمێکی بەردەکەوێت، ئەگەر پارەی هەموویان بەیەکەوە بەردەست بخرێت جەنجاڵییەکی زۆر دروست دەکرێت، بەردەوامیش کار لەسەر دانانی ئەی تی ئێمی زیاتر دەکرێت .

ئەمەش بزانە: لەکۆی یەك ملیۆن مووچەخۆر، تاوەكو ئێستا 732 هەزار فەرمانبەر و مووچەخۆر لە پڕۆژەی هەژماری من تۆمار كراون، 405 هەزار كارتی بانك دابەش كراون و 313 هەزار مووچەخۆریش کارتەکەیان کارایە.