وەزیرانی بەرگریی لوبنان و سووریا لەبارەی کێشەی سنوورەکانی نێوانیان کۆدەبنەوە

ئاڤا نیوز

 

بڕیارە ئەمڕۆ وەزیری بەرگریی لوبنان لەگەڵ هاوتا سوورییەکەی بۆ گفتوگۆ لەبارەی کێشەکانی سنوورەکانی نێوانیان لە سعودییە کۆببنەوە.

 

وێنە گەورەکە: میدیاکانی سووریا و لوبنان  بڵاویانکردووەتەوە، بڕیارە ئەمڕۆ پێنجشەمە 27-3- 2025، لە شاری جەددەی سعودیە، میشێل میناسا، وەزیری بەرگریی لوبنان لەگەڵ مورهەف ئەبو قەسرا، هاوتا سوورییەکەی کۆببێتەوە. ئەوە لەکاتێکدایە بڕیاربوو کۆبوونەوەکە دوێنێ چوارشەممە لە دیمەشق بکرێت. 

 

ئەوەی لەبارەیەوە دەگوترێت: بەگوتەی بەرپرسانی سووریا، هۆکاری دواخستنی کۆبوونەوەکە بەهۆی ئامادەکارییەکانی لوبنان بووە بۆ پێکهێنانی حکومەتی نوێ. بەرپرسانی لوبنانیش ئەو هۆکارە ڕەتدەکەنەوە و دەڵێن، دواخستنەکە، پەیوەندی بەهیچ کێشەیەکەوە نەبووە.

 

زانیاریی زیاتر: ئەمە لە کاتێکدایە لە سنوورەکان هیچ بەربەست و هێزێکی ئەمنی نییە، ئەمە ڕێگەخۆشکەرە بۆ چەندین جۆر قاچاخچێتی لە ناوچەکەدا، لەوانەش ئامێری قورسی حکومەتی پێشووی سووریا دەدزرێن و ئاودیوی لوبنان دەکرێن و دەفرۆشرێن.

 

باکگراوند: لە 16-03-2025، سێ سەربازی سووریا کەوتنە نێو بۆسەیەکی چەکدارانی نزیک لە حیزبوڵڵای لوبنان و لەسەر سنووری هەردوو وڵات کوژران. ئەمەش بووە هۆی تێکچوونی پەیوەندییەکانی سووریا و لوبنان، تەنانەت سوپای سووریا وەک تۆلەکردنەوەی کوژرانی سێ سەربازەکەی،  لەسەر سنووری  نێوانیان چەند پێگەیەکی لەناو خاکی لوبنان بۆردوومان کرد.