لە پاریس شەقام و پارکێک بەناوی پێشمەرگەوە دەکرێت

ئاڤا نیوز

پارێزگاری هەولێر ڕایدەگەیەنێت، لە پاریس پارک و شەقامێک بە ناوی پێشمەرگە دەکرێت و لە هەولێریش ماڵی پاریس دەکرێتەوە.

 

چیرۆکی سەرەکی: لە چوارچێوەی سەردانەکەى بۆ پاریس و بەمەبەستی بەشداریکردنى لە ڕێورەسمى ئاهەنگى نەورۆز، ئەمڕۆ پێنجشەممە 2025.3.27، ئومێد خۆشناو، پارێزگاری هەولێر، سەردانى شارەوانی گەورەی پاریسی کرد و لەگەڵ ئان هیدالگۆ، سەرۆکی شارەوانیی پاریس کۆبووەوە.

 

لێدوانی فەرمی: ئومێد خۆشناو، پارێزگاری هەولێر ڕایگەیاند، فەرەنسا بەچاوی ڕێزەوە لە پێشمەرگە دەڕوانێت و لەم چوارچێوەیەشدا بڕیار دراوە، پارک و شەقامێک لە پاریس بەناوی پێشمەرگە بکرێت و لە ئاییندەیەکی نزیکدا بەئامادەبوونی بەرپرسانی هەرێمی کوردستان و وڵاتی فەرەنسا، لەڕێوڕەسمێکی شایستەدا ئەو پارک و شەقامە بکرێتەوە.

 

زانیاریی زیاتر: لەبەشێکی کۆبوونەوەکە، پڕۆسەی نۆژەنکردنەوەی قەڵاتی هەولێر باسکرا، پارێزگاری هەولێر بە سەرۆکی شارەوانیی پاریسی ڕاگەیاند، کار بۆ دابینکردنی خانوویەک لەنێو قەڵا دەکەین کە وەکو ماڵی پاریس بناسێندرێت.

 

ئەوەش بزانە: هاوکات گفتۆگۆ لەبارەی ئامادەکارییەکانی کۆبوونەوەی پارێزگار و سەرۆک شارەوانیەکانی فرانکۆفۆنی کرا کە لە مانگی چواری ئەمساڵ لە ڤێتنام بەڕێوەدەچێت، لەوبارەیەشەوە پارێزگاری هەولێر، ئامادەیی هەولێر و هەرێمی کوردستانی نیشاندا کە کۆبوونەوەی فڕانکۆفۆنی بۆ ساڵی داهاتوو واتە بۆ ساڵی 2026، لە هەولێری پایتەخت بەڕێوەبچێت.