لە سێ مانگدا زیاتر لە هەزار و 500 بازرگانی ماددە هۆشبەرەکان لە عێراق دەستیگرکراون

 

ئاڤا نیوز

تەنیا لە سێ مانگی ئەم ساڵدا هێزە ئەمنییەکانی عێراق، هەزار و 559 بازرگانی ماددە هۆشبەرەکانیان لە پارێزگاکانی عێراق جگە لە هەرێمی کوردستاندا دەستگیرکردووە.

وێنە گەورەکە: زۆربوونی بەکارهێنان، بازرگانیکردن و بەرهەمهێنانی ماددە هۆشبەرەکان لە عێراق، بەشێوەیەک زیادی کردووە ڕێکخراوە خۆماڵی و نێودەوڵەتییەکان هۆشدارییان داوە عێراق خەریکە ببێتە ناوەندێک بۆ بڵاوبوونەوەی ئەو مادانە لە ناوچەکەدا.

ڕاگەیێنراوی فەرمی: حوسێن یوسف تەمیمی، وتەبێژی بەڕێوەبەرایەتیی گشتیی ماددە هۆشبەرەکان و کارتێکەرە دەروونییەکان ڕایگەیاند: لەم ساڵ تاوەکو ئێستا، دەست بەسەر دوو تۆن و 156 کیلۆگرام ماددەی هۆشبەردا گیراوە، هاوکات 194 بازرگانی نێودەوڵەتی و هەزار و 365 بازرگانی ناوخۆیی بەو ماددەیە دەستگیرکراون.

ئەوەی پێویستە بیزانیت: بە گوێرەی ناوەندی ستراتیژی بۆ مافەکانی مرۆڤ لە عێراق لە سێ ساڵی ڕابردوودا، 2022، 2023 و 2024ـدا، 40 هەزار کەس بە تۆمەتی ماددە هۆشبەرەکان دەستگیر کراون.