موفتییەکی نوێ بۆ سووریا دادەنرێت

ئاڤا نیوز

بە بڕیاری سەرۆککۆماری سووریا بۆ قۆناغی ڕاگوزەر، ئەنجوومەنی باڵای فەتوا لە سووریا پێکدەهێنرێت و موفتییەکی نوێش بۆ سووریا دادەنرێت.

 

ئەوەی پێویستە بیزانیت: دانانی موفتی نوێی سووریا، لەکاتێکدایە پێش چەند ڕۆژێک دەستگیرکردنی موفتی پێشووی سووریا ڕاگەیێنرا.

 

بڵاوکراوەی فەرمی: بەگوێرەی هەواڵێکی ئاژانسی سانای سووریا، ئەحمەد شەرع، سەرۆککۆماری سووریا بۆ قۆناغی ڕاگوزەر دوو بڕیاری دەرکرد بە دانانی شێخ ئوسامە ڕوفاعی، وەک موفتی گشتی بۆ کۆماری سووریا و پێکهێنانی ئەنجوومەنی باڵای فەتوا.

 

شێوازی جێبەجێکردن: بەگوێرەی بڕیارەکەی ئەحمەد شەرع:

ماددەی یەکەم: شێخ ئوسامە ڕوفاعی، وەک موفتی گەورەی کۆماری عەرەبی سووریا دەستنیشان دەکرێت.

ماددەی دووەم: موفتی گەورە سەرپەرشتی کاری ئەنجوومەنی باڵای فەتوا دەکات و بەرپرسیار دەبێت لە جێبەجێکردنی بڕیار و ڕاسپاردەکانی.

ماددەی سێیەم: موفتی گەورە - یان نوێنەرەکەی - نوێنەرایەتی کۆماری عەرەبی سووریا دەکات لە کۆڕبەندە فەرمی و نێودەوڵەتییەکان کە پێویستیان بە ئامادەبوونی نوێنەری شەرعی هەیە بۆ دەرکردنی فەتوا، دوای هەماهەنگی لەگەڵ لایەنە پەیوەندیدارەکانی ئەو وڵاتە.

ماددەی چوارەم: ئەم بڕیارە لە ڕێککەوتی دەرچوونییەوە کاری پێدەکرێت و لە ڕۆژنامەی فەرمیدا بڵاودەکرێتەوە.