دوای جەژن مووچەی سەرجەم مامۆستایانی گرێبەست دابەش دەکرێت

 

ئاڤا نیوز

بڕیار بوو ئەمڕۆ مووچەی مامۆستایانی گرێبەستی سەر بە هەردوو وەزارەتی پەروەردە و خوێندنی باڵا دابەش بکرێت، بەڵام بە هۆی نەبوونی پارەی کاش لە بانکەکان دابەش نەکرا. وەزارەتی دارایی دەڵێت دوای جەژن مووچەکانیان وەردەگرن.

وێنە گەورەکە: لە مانگی حەوتی ساڵی ڕابردووەوە ژمارەیەک فەرمانبەر و مامۆستا لەسەر هەردوو میلاکی پەروەردە و خوێندنی باڵا بە شێوەی گرێبەست دامەزران و بەشێکیان بە تایبەت مامۆستایانی خوێندنی باڵا تا ئێستا تەنیا یەک مووچەیان وەرگرتووە.

زانیاریی زیاتر: عەلی رەئووف مستەفا، نوێنەری گشتی مامۆستایانی گرێبەستی سەر بە وەزارەتی پەروەردە کە هەواڵی ئەوەی بڵاوکردبووەوە ئەمڕۆ شەممە مووچە دابەش دەکرێت، لە ڕوونکردنەوەیەکدا دەڵێت؛ هەڵەی ئێمە نییە و ئەوەی لە توانای مندا بوو کردوومە، هەر هەواڵێکم بڵاوکردبێتەوە لەسەر قسەی لایەنی پەیوەندیدار بووە نەک قسەی من، داوای لێبوردن دەکەم.

لە لایەکی دیکەوە: د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی بە ئاڤای گوت، "لەگەڵ بەڕێوەبەری گشتیی ژمێرکاری هەماهەنگیمان کردووە، دوای ئەوەی وەزیری دارایی واژۆی لەسەر گرێبەستەکان کرد، دوای جەژن هەوڵدەدەین شایستەی دارایی مانگەکانی یەک و دووی مامۆستایانی گرێبەست خەرج بکرێت."

لێدوانی فەرمی: سەرچاوەیەک لە وەزارەتی دارایی کوردستان بە ئاڤا میدیای ڕاگەیاند: بەهۆی نەبوونی پارەی کاشەوە نەتوانرا پێش جەژن دابەش بکرێت، دوای جەژن لەگەڵ مووچەی گرێبەستی قوتابخانەکان، مووچەی مامۆستایانی گرێبەستی زانکۆ و پەیمانگەکانیش دەدرێت کە ژمارەیان چوار هەزار و 104 کەسە.