سوودانی سکاڵا دژی لەتیف ڕەشید تۆمار دەکات

ئاڤا نیوز

هەفتەی داهاتوو دادگای فیدراڵی لەسەر سکاڵایەکی سەرۆکوەزیرانی عێراق کۆدەبێتەوە کە دژی دەسەڵاتەکانی دامەزراوەی سەرۆکایەتیی کۆمار، لەسەر هەریەکە لە سەرۆکی پەرلەمان و سەرۆککۆماری عێراق تۆماریکردوون، سوودانی لە سکاڵاکەیدا دەڵێت، بەشێک لە دەسەڵاتەکانی سەرۆککۆمار دژی دەستوور و سیستمی فیدراڵین و داوا دەکات بۆ حکومەت بگەڕێنرێنەوە.

وێنە گەورەکە: سەرۆکوەزیران لە سکاڵاکەیدا ئاماژەی بەوەکردووە، یاسای دیوانی سەرۆکایەتی کۆمار لەگەڵ چەندین ماددەی دەستوور ناکۆکە لەوانەش دانانی سەرۆکی دیوانی سەرۆکایەتی کۆمار و دوو بریکارەکەی کە پلەکانیان وەزیرن، لەکاتێکدا بەگوێرەی دەستوور دانانی وەزیر دەسەڵاتی سەرۆکوەزیرانە و دەبێت لە پەرلەمان دەنگی لەسەر بدرێت، جگەلەوەش سوودانی لە سکاڵاکەیدا تانەی لە 17 دەسەڵاتی سەرۆککۆمار و سەرۆکایەتیی کۆمار داوە و پێی وایە ئەوانە تەنیا دەسەڵاتی حکومەتن نەک سەرۆکایەتی کۆمار.

ڕاگەیێنراوی فەرمی: بەگوێرەی خشتەی کۆبوونەوەکانی دادگای فیدراڵی، ڕۆژی چوارشەممەی داهاتوو (9ی نیسان) دادگاکە یەکەمین دانیشتنی خۆی لەسەر سکاڵایەکی محەممەد شیاع سوودانی، سەرۆکوەزیران ئەنجام دەدات کە لەسەر هەریەکە لە سەرۆکی پەرلەمان و سەرۆککۆماری عێراق تۆماریکردوون.

لە سکاڵاکەیدا سوودانی داوا دەکات:

یەکەم: یاسای دیوانی سەرۆکایەتی کۆمار ژمارە (4)ی ساڵی 1984 بە نادەستووری لە قەڵەم بدرێت.

دووەم: پەیڕەوی ناوخۆی سەرۆکایەتی کۆمار ژمارە (1)ـی ساڵی 2023 بە نادەستووری لە قەڵەم بدرێت.

سێیەم: دادگا بڕیارێک بدات کە لە دوای پەسەندکردنی دەستووری عێراق لە ساڵی 2005، کارکردن بە یاسای دیوانی سەرۆکایەتی کۆمار ژمارە (4)ی ساڵی 1984 نادەستووری بووە.