دۆناڵد ترەمپ پێناسی گومرگی بەسەر دوورگەیەکی بێ دانیشتوو دەسەپێنێت

ئاڤا نیوز

دۆناڵد ترەمپ پێناسی گومرگی بەسەر دورگەیەکی بێ دانیشتوو کە تەنیا نیشتمانی بەتریقەکانە دەسەپێنێت و دوورگەکە ناوی هێرد ئاند ماکدۆناڵدە و کەوتووە باشووری نیوە گۆی زەوی.

چیرۆکی سەرەکی: دوورگەکانی هێرد و ماکدۆناڵد لە کۆمەڵێک دوورگەی گڕکانی پێکهاتوون و لە نزیک ئەنتارکتیکایە، بە سەهۆڵ داپۆشراوە، نیشتمانی بەتریقەکانە، ژمارەی دانیشتووانی ئەو دوورگە دوور دەستە سفرە واتە کەسی لێ ناژیێت، بەڵام دوێنێ لە لایەن دۆناڵد ترەمپەوە بە ڕێژەی 10% پێناسی بەسەر هاوردەی کاڵاکانی ئەو دوورگەیەدا سەپێندرا.

وێنە گەورەکە: دۆناڵد ترەمپ، سەرۆکی ئەمریکا زنجیرەیەک باجی نوێی  بەسەر دەیان وڵاتی جیهان سەپاند و بە تەواوەتی جەنگی ئابووری لە دژی وڵاتانی جیهان ڕاگەیاند. ڕۆژی سەپاندنی پێناسە گومرگییەکانیشی بە ڕۆژی ئازادی ئەمریکا وەسف کرد.

ئەوەی پێویستە بیزانیت: دوورگەکانی هێرد و ماکدۆناڵد خاکێکی دوورە دەستی دەرەوەی ئوستراڵیان و لە دوورترین شوێنەکانی سەر زەوین، مرۆڤ دەتوانێت بە گەشتێکی دوو هەفتەیە لە پێرسی کەناراوەکانی ئوستراڵیاوە و گەشت بۆ دوورگەکە بکات، هیچ مرۆڤێک لەو دوورگانەدا ناژیێت و تەنانەت دوایین گەشتی مرۆڤ بۆ ئەو دوورگانە نزیکەی 10 ساڵ بەر لە ئێستا بووە.

زانیاریی زیاتر: جگە لە دوورگەکانی هێرد و ماکدۆناڵد، چەند دوورگەیەکی دیکەی دوورە دەست وەک دوورگەکانی کۆکۆس (کیلینگ) و دوورگەی کریسمس و دوورگەی نۆرفۆلک لە لیستی پێناسی گومرگی دۆناڵد ترەمپدا ناویان هاتووە و پێناسیان بەڕێژەی جیاواز بەسەردا سەپێندراوە.