38 باخچەی زێدەڕۆ لە سنووری هەولێر تێکدراون

ئاڤا نیوز

 

سەرۆکایەتیی شارەوانیی هەولێر هەڵمەتی هەڵگرتنی باخچە زێدەڕۆکانی سنووری شارەوانییەکانی هەولێری دەستپێکردووەتەوە و لەماوەی ڕابردوو 38 باخچەی نایاسایی تێکدراون کە لەسەر زەوی شارەوانی دروستکراون.

 

وێنە گەورەکە: بەشێکی دانیشتووانی هەولێر لەگەڵ دروستکردنی خانوو، بەشێکی زەوی پێش یان بەرامبەری ماڵیان دەکەن بە باخچە و شورای بۆ دروست دەکەن، ئەمەش ڕێگەپێنەدراوە و لەلایەن  لیژنەی بەدواداچوون و سەرپێچی لە سەرۆکایەتیی شارەوانی هەولێر تێکدەدرێن.

 

لێدوانی فەرمی: سەروەر قەشقەیی، بەرپرسی ڕاگەیاندنی ئەندازەی پارکەکانی هەولێر بە ئاڤای گوت، "ئەو باخچانەی زیاتر لە 5 ساڵە دروستکراون ئەوانەشی ئەم دوو ساڵە کراون تێکنادرێن، تەنانەت ئامادەین داریشی پێبدەین بیچێنێت، بەمەرجێک دوو لای کراوەبێت، نەوەک شورای بۆ کرابێت و داگیرکرابێت."

 

هۆکارە زانراوەکان: هۆکاری سەرەکی دروستکردنی باچخە لەگەڵ دروستکردنی خانوو کە زیاتر لە گەڕەکە نوێیەکان ئەو دیاردەیە هەیە، بۆ ئەوە دەگەڕێتەوە نووسینگەکانی کڕین و فرۆشتنی خانووبەرە لە کاتی ڕێکلام کردن بۆ خانووەکانیان باخچەکەش وەک  بەشێک لە خانووەکە دادەنێن بۆ ئەوەی نرخی بەرزببێتەوە و زوو بفرۆشرێت.