پەرلەمانتارێک: وەزارەتی نەوتی عێراق هەنگاوی ڕژدی لەپێناو هەناردەکردنەوەی نەوتی کوردستان نەناوە

ئاڤا نیوز

ئەندامێکی لیژنەی نەوت و غازی پەرلەمانی عێراق، وەزارەتی نەوتی عێراق تۆمەتبار دەکات بەوەی هەنگاوی ڕژدی نەناوە لەپێناو دەستپێکردنی هەناردەکردنەوەی نەوتی هەرێمی کوردستان.

وێنە گەورەکە: سەرەڕای ئەوەی دوای هەمواکردنەوەی بودجەی عێراق، چەندین کۆبوونەوەی سێ لایەنی (هەولێر و بەغدا و کۆمپانیاکان) کراون دەربارەی هەناردەکردنەوەی نەوتی هەرێمی کوردستان، کۆمەڵەی پیشەسازی نەوتی کوردستان (ئەپیکور)ـیش هۆکاری دەستپێنەکردنەوەکەی دەخاتە ئەستۆی وەزارەتی نەوتی عێراق.

ڕاگەیێنراوی فەرمی: دکتۆر سەباح سوبحی، ئەندامی لیژنەی نەوت و غاز لە پەرلەمانی عێراق ڕایگەیاند:

٠ وەزارەتی نەوت پشتی بە یاساکان بەستووە وەک مادەی 12ـی یاسای بودجەی فیدراڵی ساڵی 2023، لە جیاتی پشتبەستن بە مادە دەستوورییەکانی وەک مادەکانی 111 و 112 کە ئاماژە بەوە دەکات ئەو کێڵگانەی لە دوای ساڵی  2005 دۆزراونەتەوە مافی هەرێمی کوردستانن.

٠ وەزارەتی نەوتی عێراق هەنگاوی ڕژد و جدی نەناوە کە بانگەشەی بۆ دەکات، ئەمەش لە کۆبوونەوەکاندا دیار بوو، کە چەندین ئاستەنگی دروستکردووە لەبەردەم جێبەجێکردنی نیازی ئەنجوومەنی وەزیران بۆ ناردنی یاسای بودجەی هەموارکراو.

٠ ئەو گرێبەستانەی کە لە نێوان کۆمپانیا نێودەوڵەتییەکان (ئەپیکۆر) کە لە هەرێمی کوردستان کاردەکەن و حکومەتی هەرێمی کوردستان ئەنجامدراون، بەگوێرەی بڕیاری دادگای تێهەڵچوونەوە لە 2024-08-12، ڕەوایە.

زانیاریی زیاتر: کۆمەڵەی پیشەسازی نەوتی کوردستان (ئەپیکۆر) هۆکاری دەستپێنەکردنەوەکەی هەناردەکردنی نەوتی هەرێمی کوردستان دەخاتە ئەستۆی وەزارەتی نەوتی عێراق و ئەو وەزارەتەی تۆمەتبار کردووە کە گەرەنتیی بە کۆمپانیاکانی بەرهەمهێنانی نەوت نەداوە سەبارەت بە شێوازی پارەدان و گرێبەستەکان.

لە لایەکی دیکەوە: ئەمڕۆ هەینی، وەزارەتی نەوتی عێراق لە ڕاگەیێنراوێکدا، لێدوانەکەی "ئەپیکۆر" لەبارەی نەبوونی نیازی وەزارەتەکە بۆ دانوستان لەسەر چارەسەرکردنی پرسی جێبەجێکردنی ئەو گرێبەستانەی لەنێوان کۆمپانیاکە و حکومەتی هەرێمی کوردستان واژۆکراون بە "درۆن و چەواشەكاری" ناوبرد.

ئەمەش بزانە: وەزارەتی نەوت داوای کۆبوونەوەیەکی بەپەلە لەگەڵ لایەنە پەیوەندیدارەکان دەکات بۆ دەستپێکردنەوەی دانوستان و دیالۆگ بە مەرجێک دانوستانەکان بەگوێرەی یاسای هەموارکراوی بودجە بێت.