سەرۆکوەزیران بارزانی: خەڵکی کوردستان ڕێگە نادات عێراق بگەڕێنرێتەوە سەردەمی دیکتاتۆری

ئاڤا نیوز

سەرۆکوەزیران بارزانی بە جەختکردنەوە لە پاراستنی مافە دەستوورییەکان و قەوارەی هەرێمی کوردستان ڕایدەگەیێنێت، خەڵکی کوردستان هەرگیز ڕێگە نادات عێراق بگەڕێنرێتەوە بۆ سەردەمی دیکتاتۆری و تاکڕەوی.

پەیامی فەرمی: سەرۆکوەزیران مەسرور بارزانی بەبۆنەی تێپەڕبوونی 54 ساڵ بەسەر ڕاگەیاندنی ڕێککەوتننامەی 11ـی ئاداری 1970، پەیامێکی بڵاوکردووەتەوە و بەبیری هێناوەتەوە کە شۆڕش و خۆڕاگری و قوربانیدان، حکومەتی ئەوکاتی عێراقی ناچارکرد دان بە بەشێک لە مافە ڕەواکانی گەلی کوردستاندا بنێت .

ڕێککەوتنەکە بەمشێوەیە بوو:

• ڕێککەوتن لە سەر هەموارکردنەوەی دەستووری کاتی و داننان بەوەی عێراق لە دوو نەتەوەی سەرەکی (عەرەب و کورد) پێکهاتووە

• دەستوور دان بە مافە نەتەوەییەکانی گەلی کورد دەنێت.

زیانە سەرەکییەکان: ڕژێمی ئەو سەردەمەی عێراق لە ڕێککەوتننامەکە پاشگەز بووەوە و پەنای بردەوە بۆ شەڕ و دژایەتیکردنی خەڵکی کوردستان و سەرەنجام عێراقی دووچاری ماڵوێرانی و کارەساتی گەورە کرد کە تا ئێستاش خەڵکی عێراق باجەکەی دەدەن.

لەلایەکی دیکەوە: سەرۆکوەزیران بارزانی جەخت لە پێویستی و گرنگیی پاراستن و ڕێزگرتن لە مافە دەستوورییەکانی گەلی کوردستان و قەوارەی دەستووری هەرێمی کوردستان دەکاتەوە. دەشڵێت : "خەڵکی کوردستان هەرگیز ڕێگە نادات مافەکانی پێشێل بکرێت و ستەم و زۆرداری لێ بکرێت و عێراق بگەڕێنرێتەوە بۆ سەردەمی دیکتاتۆری و تاکڕەوی".