ئامادەکاری بۆ پڕۆسەی حەجی ئەمساڵ دەستپێکرد

 

ئاڤا نیوز

به‌رێوه‌به‌رایه‌تی گشتی حه‌ج و عومڕه‌ی كوردستان له‌گه‌ڵ سه‌رۆك و ئه‌ندامانی لیژنه‌ی تەندروستی حه‌جی ئه‌مساڵ 2025 كۆبوونه‌وه، تیشکخرایە سەر ڕێنماییه‌كانی به‌رێوه‌به‌رایه‌تی گشتی حه‌ج و عومڕه‌ی كوردستان به‌ مه‌به‌ستی خزمه‌تكردنی حاجییان.

چیرۆکی سەرەکی: پێنج هەزار و 120 کەس ئەمساڵ سەردانی ماڵی خودا دەکەن و دەبن بە حاجی، مامەڵەی وەرگرتنی ڤیزا بۆ بەشێکی زۆریان کراوە، چونکە ئەمساڵ حەجخوازان ناتوانن بە ڤیزای بازرگانی و ساڵانە حەج بکەن.

لێدوانی فەرمی: کاروان ستوونی، وتەبێژی بەڕێوەبەرایەتی حەج و عومرەی کوردستان بە ئاڤای گوت، "ناوەڕاستی مانگی پێنج یەکەم کاروانی حاجییانی کوردستان بەرەو سعوودییە بەڕێدەکەوێت، دەمانەوێت سەرجەم خزمەتگوزارییەکان بۆ حەجخوازان فەراهەم بکرێت، بەرچاوڕوونی تەواو بەو تیمانە دراوە کە یاوەریان دەبن لە کاتی بەجێگەیاندنی فەڕیزەی حەج."

لە لایەکی دیکەوە: پێشتر ده‌بوایه‌ هه‌موو پاسپۆرتی حاجییانی كوردستان ڕه‌وانه‌ی به‌غدا یاخود عه‌ممانی پایته‌ختی ئوردن بكرێت به‌ مه‌به‌ستی وه‌رگرتنی ڤیزای حه‌ج زۆرجاریش كێشه‌ بۆ پاسپۆرته‌كان دروست ده‌بوو، به‌ڵام دوای هه‌وڵه‌كانی حكومه‌تی هه‌رێمی كوردستان ئه‌م پرۆسه‌یه‌ له‌ ئێستا له‌ هه‌رێمی كوردستان ده‌كرێت هه‌ر كێشه‌یه‌ك هه‌بێت راسته‌وخۆ له‌ به‌رێوه‌به‌رایه‌تی گشتی حه‌ج و عومڕه‌ی كوردستان چاره‌ ده‌كرێت.