لیژنەیەکی باڵای لێکۆڵینەوە دەربارەی مردنی ئەندازیارە عێراقییەکە پێکدەهێنرێت

ئاڤا نیوز

بە فەرمانی سەرۆکوەزیران و فەرماندەی گشتیی هێزە چەکدارەکانی عێراق، لیژنەیەکی باڵای لێکۆڵینەوە پێکدەهێنرێت بۆ دۆسیەی ئەشکەنجەدان و گیانلەدەستدانی ئەندازیار بەشیر خالید.

چیرۆکی سەرەکی: لە چەند ڕۆژی ڕابردوودا لە بەغدا، ناکۆکییەک لەنێوان ئەندازیارێک بەناوی بەشیر خالد و ئەفسەرێکی وەزارەتی ناوخۆی عێراق بە پلەی لیوا دروست بوو و سەری بۆ شەڕ و پێکدادان کێشا، دواتریش پۆلیس ئەندازیارەكە دەستگیر دەکەن و دەیبەن بۆ زیندان و ئەشکەنجەیەکی زۆر دەدرێت، دواتر هەر لە زیندان گیانی لەدەستدا.

ڕاگەیێنراوی فەرمی: سەباح نوعمان، وتەبێژی فەرماندەی گشتیی هێزە چەکدارەکانی عێراق لە ڕاگەیێنراوێکدا ڕایگەیاند: لیژنەکە بە سەرۆکایەتی بریکاری وەزارەتی ناوخۆ بۆ کاروباری پۆلیس و بریکاری دەزگای ئاسایشی نیشتمانی و ئەفسەرێکی باڵای دەزگای هەواڵگری نیشتمانی عێراق پێکهێنراوە.

بەگوێرەی ڕاگەیێنراوەکە؛ ڕاپۆرتێکی تێروتەسەل دەربارەی دۆسیەکە دەنووسرێتەوە، هاوکات ئەنجامی لێکۆڵینەوەکەش بۆ ڕای گشتی ئاشکرا دەکرێت.

لە لایەکی دیکەوە: سەندیکای ئەندازیارانی عێراق ماتەمینی و ڕاگرتنی دەوامی فەرمی لە بارەگای سەندیکا و سەرجەم لقەکانی لە پارێزگاکانی عێراق بۆ ماوەی سێ ڕۆژ ڕاگەیاند، کە لە سبەی سێشەممە 2025-04-08ـەوە دەستپێدەکات.

زانیاریی زیاتر: وەزارەتی ناوخۆی عێراق ڕەتیدەکاتەوە ئەو ئەندازیارە لە زیندان ئەشکەنجە درابێت، لە بەرامبەردا سەندیکای ئەندازیارانی عێراق دەڵێت؛ باوەڕیان بە ڕوونکردنەوە فەرمییەکان لەمبارەیەوە نییە و جەختیش دەکاتەوە کە ناوبراو بەهۆی ئەشکەنجەوە گیانی لەدەستداوە.