سبەی لە هەرێمی کوردستان بەبۆنەی ڕووخانی دەسەڵاتی سەدام و لە عێراقیش بەبۆنەی کوژرانی باقر سەدر پشووە

ئاڤا نیوز

 

سبەی 22 ساڵ بەسەر کەوتنی بەغدا و کۆتاییهێنان بە ڕژێمی پێشووی عێراق تێدەپەڕێت، لە هەرێمی کوردستان بەو بۆنەیەوە پشووی فەرمییە، بەڵام لە چەند پارێزگایەکی عێراق بەبۆنەی ساڵیادی کوژرانی محەممەد باقر سەدر دەکرێتە پشووی فەرمی.

 

پێدراوە ڕاستییەکان: بەگوێرەی ڕۆژژمێری حکومەتی هەرێمی کوردستان، ڕۆژی 9ی نیسان بەبۆنەی ڕۆژی ڕووخانی ڕژێمی بەعس و ئازادکردنی عێراق پشووی فەرمییە. بەڵام پارێزگاکانی عێراق تەنانەت لە یاسای نوێی پشووە فەرمییەکانیش ڕۆژی 9ی نیسانی تێدا نییە، بەڵام لە ژمارەیەک پارێزگا بەبۆنەی ساڵیادی کوژرانی محەممەد باقر سەدر سبەی چوارشەممە کراوەتە پشوو.

 

ئەوەی پێویستە بیزانیت: ئەو پارێزگایانەی عێراق کە سبەی چوارشەممە 9ی نیسانیان بەبۆنەی ساڵیادی کوژرانی محەممەد باقر سەدر وەک پشووی فەرمی ڕاگەیاندووە، بریتین لە: بەغدا، کەربەلا، بابل، بەسرە، واست، زیقار، نەجەف، دیالە، موسەننا، دیوانیە و میسان.

 

باکگراوند: ڕۆژی 20ـی ئازار 2003، بە بەشداری 300 هەزار و 884 سەرباز، هێرشی وڵاتانی ھاوپەیمان بە سەرۆکایەتیی ئەمریکا بۆ سەر عێراق دەستی پێکرد و ڕۆژی 9ی نیسان کۆتایی بە حکومڕانی 35 ساڵەی بەعس لە عێراق هێنرا.