لە زانکۆی سەڵاحەدین کۆنفرانسی گۆڕانکارییەکانی کەشوهەوا بەڕێوەدەچێت

ئاڤا نیوز

ئەمڕۆ لە زانکۆی سەڵاحەدین لە هەولێر یەکەمین کۆنفرانسی نێودەوڵەتیی کەشوهەوا بەسەرپەرشتی سەرۆکوەزیران مەسرور بارزانی بۆ گۆڕانکارییەکانی کەشوهەوا بەڕێوەچوو.

 

وێنە گەورەکە: ئەمڕۆ سێشەممە لە زانکۆی سەلاحەدین یەکەمین کۆنفرانسی نێودەوڵەتیی گۆڕانی کەشوهەوا و ئاستەنگ و چارەسەرەکانی بەڕێوەچوو. بەشێک لە کۆنفرانسەکە تایبەتە بە دیراسەکردن و لێکۆڵینەوە لەسەر ژینگەی هەرێمی کوردستان و ئەو دوکەڵە ڕەشەی بەسەر ئاسمانی شاری هەولێرەوەیە و بۆ سبەیش کۆنفرانسەکە بەردەوامی دەبێت.

 

لێدوانی فەرمی: بێگەرد تاڵەبانی، وەزیری کشتوکاڵی حکومەتی هەرێمی کوردستان لە کۆنفراسەکە کۆمەڵێک ژمارەی نوێی لەبارەی دۆخی ئاو لە کوردستان وت و ڕایگەیاند: سێ بەنداوی ستراتیژیمان هەیە، پێشنیاز کراوە چوار بەنداوی دیکەی ستراتیژی لە هەرێمی کوردستان دروست بکرێت، بەڵام حکومەتی عێراق پێنج ساڵە بەهۆی ڕۆتینەوە ڕێکارەکان تەواو ناکات.

 

ئەوەی پێویستە بیزانیت: بەشێک لە وتەکانی بێگەرد تاڵەبانی لە کۆنفرانسەکە:

 

- تەنیا بەنداوی دەربەندیخان و دووکان توانای کۆگاکردنی  ئاوی 30% هەموو عێراقیان هەیە.

- لە ڕابردوو توانای گلدانەوەی ئاو تەنیا 50 ملیۆن مەتر سێجا بووە، بەڵام لەماوەی پێنج ساڵی تەمەنی کابینەی نۆیەمدا ئەو توانایە بەرزکرایەوە بۆ زیاتر لە 160 ملیۆن مەتر سێجا.

• - ئێستا 25 بەنداوی تەواوکراو هەن کە ئاو گل دەدەنەوە.
  - 12 بەنداویش لەژێر جێبەجێکردنن.
  - پێشنیازی دروستکردنی 42 بەنداویش کراوە.
  - هاوکات لەماوەی ئەو پێنج ساڵە 103 پۆندیش دروستکراون.
  - ئێستا 56 پۆند لەژێر جێبەجێکردنن و پێشنیازی دروستکردنی 46 پۆندی دیکەش کراوە.
•  

زانیاریی زیاتر: کۆنفرانسەکە بە بەشداری 15 وڵات و 29 زانکۆی ناوخۆیی و عێراقی و وڵاتانی عەرەبی و ئەورووپی بەڕێوەدەچێت.