سەرۆک بارزانی: ئەگەری شەڕی گەورە لە ناوچەکە هەیە

ئاڤا نیوز

 

سەرۆک بارزانی لە پێشانگای نێودەوڵەتیی هەولێر بۆ کتێب ئاماژەی بەوە کرد، لە ئەنجامی گرفتە گەورەکانی ناوچەکە ئەگەری هەیە شەڕی گەورەش بەڕێوەبێت و پێویستە کاربەدەستانی عێراق وڵاتەکەیان لەو شەڕانە دوور بخەنەوە.

 

وێنە گەورەکە: بە بەشداریی سەرۆک بارزانی پێشانگای نێودەوڵەتیی هەولێر بۆ کتێب کرایەوە و 10 ڕۆژ بەردەوام دەبێت، زیاتر لە 350 ناوەندی چاپ و بڵاوکردنەوە لە 22 وڵاتی جیهانەوە بەشداریی پێشانگای ئەمساڵیان کردووە.

 

لێدوانی فەرمی: سەرۆک بارزانی لەمیانی بەشداریکردنی لە کردنەوەی پێشانگاکە گوتارێکی پێشکەش کرد و ڕایگەیاند: کێشەکانی نێوان هەولێر و بەغدا تا ڕادەیەک چارەسەر کراون، بەڵام هێشتا زۆری ماوە، لە دوای ڕووخانی ڕژێمی بەعس لە ساڵی 2003، عێراقی نوێ لەسەر سێ بنەمای سەرەکی دامەزرا کە بریتیە لە؛ هاوبەشی، هاوسەنگی و سازان بەڵام بەداخەوە پێیەوە پابەند نەبوون

 

زانیاریی زیاتر: "لە ساڵی 2005، دەستووری عێراق نووسراوە و کورد ڕۆڵێکی سەرەکی لەمبارەیەوە هەبوو، 85٪ هاووڵاتییان دەنگیان پێدا، ئەگەر پابەندی بەو دەستوورە کرابا زۆرێک لەو کێشانەی نێوان هەرێمی کوردستان و بەغدا ڕوویان نەدەدا".

 - ئێستاش چارەسەری بنەڕەتی، گەڕانەوەیە بۆ ئەو سێ بنەمایە و پابەندبوونە بە دەستوور. 

 

- لە دەوروبەرمان گرفتی زۆر گەورە هەیە و شەڕی گەورەش بەڕێوەیە.

 

- پێویستە کاربەدەستانی بەغدا بە هەموو توانایانەوە هەوڵبدەن عێراق تێکەڵاوی ئەو شەڕانە نەبێت.

 

زانیاریی زیاتر: ئەم هۆشدارییەی سەرۆک بارزانی لە کاتێکدایە چەندین شەڕ و گرژیی لە ناوچەکەدا هەیە، بەتایبەتی هێرشەکانی ئەمریکا بۆ سەر حووسییەکانی یەمەن و دەستپێکردنەوەی جەنگی غەززە و گۆڕانکارییەکانی سووریا.