پرۆسەی تەواوکردنی مامەڵەی خانەنشینانی نوێ خێرا دەکرێت

ئاڤا نیوز

 

بەڕێوەبەرایەتیی گشتیی خانەنشینی کوردستان بۆ خێراترکردنی تەواوکردنی مامەڵەی خانەنشینانی نوێ ڕێکارێکی نوێ دەگرێتەوە بەر، بۆ ئەوەی لەماوەیەکی کەمدا سەرجەمیان لە لیستی مووچە جێگە بکرێنەوە و مووچەی ئەو مانگانەش وەرگرن کە تاوەکو ئێستا وەریاننەگرتووە.

 

وێنە گەورەکە: ئەمساڵ لە دایكبووانی ساڵەكانی 1962، 1963 و 1964 لە هەرێمی كوردستان كە ژمارەیان لە 25 هەزار كەس زیاترە، خانەنشین بوون، بەڵام تائێستا مامەڵەی بەشێکی زۆریان تەواونەکراوە و چوار مانگە مووچەیان وەرنەگرتووە.

 

زانیاریی تایبەت: سەرچاوەیەکی باڵا لە بەڕێوەبەرایەتیی گشتیی خانەنشینی بە ئاڤای گوت، "جگە لەوەی هەر 14 بەڕێوەبەرایەتییەکەی خانەنشینی دەسەڵاتیان هەیە لای خۆیان مامەڵەکان تەواو بکەن، ئەو بەڕێوەبەرایەتییانەی پێویستیان بە کارمەندە بۆیان دابینکراوە، لەوانە خانەنشینی یەک و دووی هەولێر، تا لەماوەیەکی کەمدا مامەڵەی زۆرترین خانەنشین تەواو بکرێت."

 

ئەمەش بزانە: بڕیاری هاوتاکردنی مووچەی خانەنشینان لە ڕێککەوتی 23-11-2022، لەلایەن دادگای فیدراڵیی عێراق دەرکرا و ساڵی 2024 لە هەرێمی کوردستان لەسەر بنەمای یاسای ژمارە 9ـی ساڵی 2014ی خانەنشینی یەکگرتووی عێراق جێبەجێ کرا.