تەندروستیی عێراق داوای زیادکردنی دەرماڵەی مەترسیی پەرستار و کارمەندان دەکات

ئاڤا نیوز

 

وەزارەتی تەندروستیی عێراق داوا لە ئەنجوومەنی وەزیران دەکات، دەرماڵەی مەترسیی پەرستار و کارمەندانی تەندروستیی بەڕێژەی 20% زیاد بکرێت.

 

ئەوەی پێویستە بیزانیت: نووسراوەکەی وەزارەتی تەندروستی هاوکاتە لەگەڵ خۆپیشاندانی مامۆستا و فەرمانبەرانی پەروەردە لە هەموو پارێزگاکانی عێراق بۆ زیادکردنی مووچە و دەرماڵەکانیان، بەڵام بەهۆی دابەزینی بەهای نەوت بەڕێژەیەکی بەرچاو، چاوەڕێ ناکرێت حکومەت بچێتە ژێرباری هیچ داواکارییەک کە بارگرانیی دارایی زیاتر دروست بکات.

 

نوسراوی فەرمی: بەگوێرەی نوسراوێک کە 7ی ئەم مانگە بە واژۆی ساڵح حەسناوی، وەزیری تەندروستیی عێراق دەرچووە و ئاڕاستەی ئەمیندارییەتی گشتیی ئەنجوومەنی وەزیران کراوە، ئاماژە بەوەكراوە، بەگوێرەی یاسای مووچەی فەرمانبەری دەوڵەت، ئەنجوومەنی وەزیران دەتوانێت بەڕێژەیەک دەرماڵە زیاد بکات بەمەرجێک لە  50%ی مووچە زیاتر نەبێت.

 

زانیاریی زیاتر: ئەوەشی خستووەتەڕوو، بۆیە بە ڕەچاوکردنی ڕۆڵی کارمەندانی تەندروستی کە بنەمای سیستمی تەندروستین و بۆ گەرەنتیکردنی پێشکەشکردنی خزمەتگوزارییەکان بە باشترین شێوە، داوا دەکەن ڕەزامەندی بدرێت و دەرماڵەی مەترسیی کارمەندانی تەندروستیی بەڕێژەی 20% زیاد بکرێت.