باڵیۆزی نوێی بەریتانیا لە عێراق دەستبەکاردەبێت؛ موسڵمانە و پاکستانییە

ئاڤا نیوز

باڵیۆزی نوێی بەریتانیا لە بەغدا نامەی دەستبەکاربوونی دایە سەرۆککۆماری عێراق، بەوەش ئەمڕۆ پێنجشەممە بە فەرمی لە پۆستەکەیدا دەستبەکاربوو، باڵیۆزی نوێی شانشینیی یەکگرتوو بە نەژاد پاکستانییە و لە ساڵی 2022ـەوە نوێنەری باڵای وڵاتەکەی بووە لە قوبرس.

چیرۆکی سەرەکی: لە تەمموزی ساڵی 2023ـەوە تا مانگی ئاداری ئەمساڵ، ستیڤن هیچن باڵیۆزی بەریتانیا بوو لە عێراق، ناوبراو جگە لەوەی زمانی عەرەبی بەباشی دەزانیی، چالاکیی و لێدوان و جوڵەکانیش وایکرد حکومەتی عێراق نامەی ناڕەزایی پێبدات و بە دەستوەردان لەکاروباری ناوخۆی وڵاتەکەدا تۆمەتباریی کرد.

ڕاگەیێنراوی فەرمی: سەرۆکایەتی کۆماری عێراق بڵاویکردەوە، د.لەتیف ڕەشید، سەرۆککۆماری عێراق نامەی دەستبەکاربوونی لە عیرفان سدیق، باڵیۆزی نوێی بەریتانیای لە بەغدا وەرگرت و جەختیکردەوە لەسەر ئەوەی عێراق خواستی برەودانی زیاتر بە پەیوەندییەکانی لەگەڵ بەریتانیا هەیە.

زانیاریی زیاتر: عیرفان سدیق، باڵیۆزی نوێی بەریتانیا لە عێراق زمانی عەرەبی بەپاراوی دەزانێت و موسڵمانە، هاوکات بە نەژاد پاکستانییە و لە ساڵی 1998ـەوە لە کەرتی دیپلۆماسی بەریتانیادا کار دەکات، پێشتریش باڵیۆزی وڵاتەکەی بووە لە سووریا، ئازەربایجان و سوودان.