سەفین دزەیی: وڵاتان چاوەڕوانی پێكهێنانی حكومەتێكی كاریگەرن لە هەرێمی كوردستان

ئاڤا نیوز

بەرپرسی فەرمانگەی پەیوەندییەكانی دەرەوەی هەرێمی كوردستان ڕایدەگەیەنێت، وڵاتانی جیهان بە پەرۆشی پێكهێنانی حكومەتێكی كاریگەرن لە هەرێمی كوردستان لەكاتێكی نزیكدا.

 

وێنە گەورەكە: پێگەی سیاسیی هەرێمی كوردستان لەسەر ئاستی نێودەوڵەتی، گەیشتووەتە ئاستێكی پێشكەوتووتر لەجاران و تا دێت پەیوەندییە دیپلۆماسییەكانی هەرێمی كوردستان و وڵاتان بەهێزتر دەبێت، دوای بەڕێوەچوونی پرۆسەی هەڵبژاردنی پەرلەمانی كوردستان بەشێوەیەكی دیموكراسیانە و ئاشتیخوازانە، ئێستا چاوەكان لەسەر هەرێمی كوردستانن بۆ پێكهێنانی كابینەی دەیەمی حكومەتی هەرێمی كوردستان.

 

لێدوانی فەرمی: سەفین دزەیی، بەرپرسی فەرمانگەی پەیوەندییەكانی دەرەوەی هەرێمی كوردستان بە ئاڤای ڕاگەیاند، وڵاتان چاوەڕوانی پێكهێنانی حكومەتێكی كاریگەرن لە هەرێمی كوردستان، بەپێویستیشی دەزانن پەلە بكرێت لە پێكهێنانی كابینەی نوێی حكومەتدا.

- دزەیی باسی لەوەشكرد، دانووستانەكانی نێوان پارتی و یەكێتی، هەنگاوی زۆر باشی بڕیوە.

- خۆشبەختانە ناكۆكی و مەترسییەكانی ناوچەكە نەگەیشتووەتە هەرێمی كوردستان، بەڵام ئەوە بەو مانایە نایەت كە كاریگەریی و مەترسی پێشبینیكراوی لەسەر هەرێمی كوردستان نەبێت.