سەرۆکی هەرێمی کوردستان و سەرۆککۆماری تورکیا کۆبوونەوە

 

ئاڤا نیوز

سەرۆکی هەرێمی کوردستان و سەرۆککۆماری تورکیا کۆبوونەوە و چەندین پرسی گرنگیان تاوتوێ کرد، لەوانە پڕۆسەی ئاشتی لە تورکیا.

چیرۆکی سەرەکی: ئێواره‌ى ئەمڕۆ 2025-04-11، له‌ چوارچێوه‌ى به‌شداريكردنیدا له‌ كۆڕبه‌ندى دیپلۆماسی ئەنتالیا، نێچیرڤان بارزانی، سەرۆکی هەرێمی کوردستان له‌گه‌ڵ ڕەجەب تەيب ئەردۆغان، سەرۆککۆماری تورکیا كۆبووه‌وه‌.

ڕاگەیێنراوی فەرمی: سەرۆکایەتی هەرێمی کوردستان ڕایگەیاند: لە کۆبوونەوەکەدا گرنگی پەیوەندییه‌كانى توركيا له‌گه‌ڵ عێراق و هەرێمی کوردستان له‌ هه‌موو بواره‌كاندا باسکرا، هەروەها تيشک خرایە‌ سه‌ر پرۆژه‌ى ڕێگه‌ى گه‌شه‌پێدان، جه‌خت لەسەر خواستى هەردوولا‌ بۆ فراوانکردنی هاوکاريی هاوبه‌ش به‌ شێوه‌يه‌ك خزمەت بە بەرژەوەندییە هاوبەشەکانى بکات.

بەشێکی دیکە لە ڕاگەیێنراوەکەی سەرۆکایەتی هەرێمی کوردستان:

٠ پرۆسه‌ى ئاشتى و دوا كۆبوونه‌وه‌ى ئه‌ردۆغان له‌گه‌ڵ شاندى ئيمرالى باسکرا، سەرۆکی هەرێمی کوردستان ئامادەیی بۆ هەر هاوکارییەک لە پێناو سەرخستنی پرۆسەی ئاشتی دەربڕی، هاوکات پرۆسەکەی به‌ مێژوويى له‌ قه‌ڵه‌م دا.

٠ نێچیرڤان بارزانی ڕایگەیاند کە پرۆسەی ئاشتی دەرفەتێکە دەبێت هەمووان زۆر بە جدی وەریبگرن، نابێت ئەم دەرفەتە لەدەست بدرێت، پێویستە پەکەکەش بەپیر بانگەوازەکەی عەبدوڵڵا ئۆجەلان بچێت و پێیەوە پابەند ببیت.

٠ لەمیانی کۆبوونەوەی نێوان سەرۆکی هەرێمی کوردستان و سەرۆککۆماری تورکیا، دواین پێشهاتەکانی ناوچەکە و دۆخی سووریا و گرنگی پاراستنی ئارامی و سەقامگیری و چەند پرسێکی دیکە تاوتوێ کران.