عێراق 38 باڵیۆزی نوێ لە وڵاتان دادەمەزرێنێت؛ هەشتیان کوردن

ئاڤا نیوز

وەزارەتی دەرەوەی عێراق، 38 باڵیۆزی لە وڵاتاندا دەگوڕێت و ناوی شوێنگرەوەیانی دیاریکردووە، ماوەتەوە ڕەوانەی پەرلەمانی بکات و پەسەند بکرێن، هەشت باڵیۆزیش لەوانە پشکی کوردن.

وێنە گەورەکە: حکومەتی عێراق بۆ پڕکردنەوەی بۆشایی باڵیۆزخانەکان و ئەو دامەزراوانەی سەر بە وەزارەتی دەرەوەن، لە ئێستادا لە سەروبەندی دانانی 38 باڵیۆزە.

لێدوانی فەرمی: سەگڤان سندی، ئەندامی پەرلەمانی عێراق بە ئاڤا میدیای ڕاگەیاند: وەزارەتی دەرەوەی عێراق بڕیاری دانانی 38 باڵیۆزی نوێی داوە، هەشتیان لەسەر پشکی کوردن، ماوەتەوە لە پەرلەمان دەنگیان لەسەر بدرێت کە لەم هەفتەیە پەرلەمان بابەتەکە یەکلایی دەکاتەوە.

لەو هەشت باڵیۆزە کوردە، چواریان پشکی پارتی دیموکراتی کوردستانن، سیانیان پشکی یەکێتی نیشتیمانیی کوردستانن هاوکات یەک باڵیۆزیش لەسەر پشکی دکتۆر بەرهەم ساڵح، سەرۆککۆماری پێشووی عێراقە.

زانیاریی زیاتر: 15 ساڵە لە عێراق هیچ باڵیۆزێکی نوێ دانەنراوە، لە کاتێکدا حکومەتی عێراق بۆ پڕکردنەوەی ئەو بۆشاییەی لەو پلە وەزیفییە هەیەتی بە گشتی پێویستی بە زیاتر لە 140 باڵیۆز هەیە.