شیفا بارزانی: ڕەوەندی كوردستانی لۆبییەكی بەهێز لە دەرەوەی وڵات درووستدەكات

ئاڤا نیوز

كوردستان حەسەن، پەیامنێری دیپلۆماسی ئاڤا نیوز، چاوپێکەوتنێکی لەگەڵ سەرپەرشتیاری گشتیی ڕەوەندی کوردستانی کردووە، شیفا بارزانی ئاماژە بە پرۆژە و پلانەکانیان دەکات بەتایبەت بە درووستکردنی لۆبییەکی بەهێز لەدەرەوەی وڵات.

ئاڤا نیوز: پڕۆژەکەتان چییە و ئامانجەکەی چییە، سەردانی زۆربەی وڵاتەکانتان کرد داواکاریتان پێشکەش کرد، وەڵامی داواکەتان چی بوو ؟

شیفا بارزانی: ئامانجی ئێمە لەم پڕۆژەیە ئەوەیە کوردانی تاراوگە بخەینە ژێر یەک چەتر، سێ پرەنسیپی سەرەکیمان هەیە بۆ کۆکردنەوەی هاونیشتمانیان وەک کۆنفیدراسیۆنێک کاربکەن و لۆبیەکی بەهێز لە دەرەوەی وڵات بۆ ئاڵای کوردستان و ناساندنی پێشمەرگە وەک ڕەمزی خۆڕاگری، هەر لایەنێک بەبێ ڕەچاوکردنی لایەنی نەتەوەیی، سیاسی هەر ئەو ڕێکخراوانەی چالاکی مەدەنی لە وڵاتان دەکەن دەتوانن بێنە نێو کۆنفدڕاسیۆنی ڕەوەندی کوردستانی بکات.

ئاڤا نیوز: لە پەرلەمانی کەنەدا داوای پشتیوانیتان بۆ هەرێمی کوردستان کردبوو ؟

شیفا بارزانی: پەرلەمانی کەنەدا، پاڵپشتی خۆی بۆ هەرێمی کوردستان دەربڕی و بەڵێنی دا دەنگی ئێمە بگەیێنێتە حکومەتی کەنەدا، داوامان لێکرد لەگەڵ دۆستانی خۆی لە ئەمریکا و ئەوروپا، بابەتی ئەو هەڕەشانەی کە لەسەر هەرێمی کوردستان هەیە بە ڕژدی وەربگیرێت، ئەو ستەمەی کە ئێران و سوپای پاسداران لە هەولێری دەکات، ئەو پرسە مایەی نیگەرانی ئەوان بوو گوتی ئەمە بە هیچ شێوەیەک قابیلی قبووڵ نییە، هەروەها شاندێکی باڵای پەرلەمانی کەنەدا و سیناتۆرەکان بەڵێنیان داوە بەمزووانە سەردانی هەولێر بکەن، بەتایبەت ئەو شوێنەی کە هێرشی مووشەکی کراوەتە سەر و  سەردانی ئەو کەسانەش دەکەن کە زیانیان بەرکەوتووە.

ئاڤا نیوز: بەپێی زانیارییەکان وابڕیارە خەڵاتی ڕێزلێنانی سەرۆک بارزانی بە دۆستە نەرویجییەکانی کورد دەبەخشرێت؟

شیفا بارزانی: سەرەتای مانگی نیسان پلانمان ئەوەیە لە نەرویج دۆستانمان خەڵات بکەین، کە چەند ساڵێکە پشتگیری دۆزی کورد دەکەن، کە پێکهاتوون لە ژمارەیەک پەرلەمانتاری خانەنشینی ئەو وڵاتە، ژمارەیەک سیاسەتمەدار، ڕۆژنامەنووس و کەسایەتی بەرچاو لەم ئیڤێنتە میوانداری کراون.

ئاڤا نیوز: ئەمساڵ  یادی جەژنی نەتەوەیی نەورۆز لە نێو پەرلەمانی بەریتانیا دەکرێتەوە، گوتارتان دەبێت، دەتانەوێت چ پەیامێک بگەیێنن؟

شیفا بارزانی: لەوێ گوتارمان دەبێت، بەڵام لەبەر ئەوەی بۆنەکە زیاتر کولتورییە، پەیامەکەمان نەتەوەیی دەبێت، سڵاوی گەلی کورد دەگەیێنینە جیهان، گرنگە لەنێو گەلانی جیهان ڕەوەندی کوردی پەیامی هەبێت.