یەکەم لێدوانی ترەمپ سەبارەت بە دانووستانەکانی لەگەڵ ئێران

ئاڤا نیوز

 

دوای بەڕێوەچوونی یەکەم دانووستانی ئەمریکا لەگەڵ ئێران، ترەمپ ڕایگەیاند، دانووستانەکان لەگەڵ ئێران سەبارەت بە بەرنامە ئەتۆمییەکەی "بە باشی بەڕێوەچووە.

 

وێنە گەورەکە: بە نێوەندگیری عومان، ئەمریکا و ئێران لەسەر ئاستی باڵا کۆبوونەوەیەکی ناڕاستەوخۆیان ئەنجامدا لەسەر پرسی بەرنامەی ئەتۆمی ئێران و دۆخی ناوچەکە و هەردوولاش کۆبوونەوەکەیان بە ئەرێنی و بەرهەمدار وەسفکرد.

 

لێدوانی فەرمی: دۆناڵد ترەمپ، سەرۆکی ئەمریکا سەبارەت بە دانووستانەکان ڕایگەیاند، دانووستانەکە بە باشی بەڕێوەچوو، ئێستا هیچ شتێک گرنگ نییە تا دانووستانەکان کۆتاییان دێت، بۆیە حەز ناکەم باسی بکەم.

 

لەلایەکی دیکەوە: کۆشکی سپی لە بەیاننامەیەکدا ئاماژەی بەوەکرد، ویتکۆف دڵنیایی دایە عێراقچی کە ڕێنمایی لە ترەمپ وەرگرتووە بۆ چارەسەرکردنی ناکۆکییەکانی نێوان هەردوو وڵات لە ڕێگەی دیالۆگ و دیپلۆماسییەوە.

 

ئەوەی لەبارەیەوە دەگوترێت:عەباس عێراقچی، وەزیری دەرەوەی ئێران ڕایگەیاند، هەردوولامان ڕێککەوتین لەسەر بەردەوامیی دانووستانەکان، ڕەنگە شەممەی داهاتوو ئێران و ئەمریکا لە ماوەیەکی کورتخایەندا بگەنە ڕێککەوتن.

 

ئەوەی پێویستە بیزانیت: لە 19-4-2025 جارێکی دیکە دانووستانەکانی نێوان ئەمریکا و ئێران  ئەنجامدەرێت، بەڵام بە وتەی عێراقچی، ئەگەر هەیە دانووستانەکان لە عومان نەبێت، بەڵام عومان هەر وەک ئەمجارە نێوەندگیری دەکات