دەرچووانی دانەمەزراو لە پارێزگای دیالە خۆپیشاندان دەکەن

ئاڤا نیوز

 

ماوەی چەندین ڕۆژە خۆپیشاندانی چین و توێژە جیاوازەکانی عێراق بەردەوامی هەیە، دوا بەدوای خۆیشاندانی مامۆستایان ئێستا دەرچووانی دانەمەزراوی پارێزگای دیالەش گردبوونەوەی ناڕەزایەتییان دەستپێکردووە.

 

زانیاریی بەدەستهاتوو: بەیانیی ئەمڕۆ یەکشەممە، بۆ جاری دووەم لەم هەفتەیەدا، دەرچووانی دانەمەزراوی زانکۆ و پەیمانگاکان لە پارێزگای دیالە، ڕژاونەتە سەر شەقامەکان و ئاڕاستەی گردبوونەوەکەیان بەرەوە باڵەخانەی حکومەتی خۆجێی پارێزگاکە بووە، داواکاری سەرەکیی خۆپیشاندەرانیش دامەزراندن و ڕاگەیاندنی گرێبەستی کارکردنیانە. 

  
زانیاریی زیاتر: هەفتەی ڕابردوو، بۆ ماوەی چەند ڕۆژێک لە زۆربەی پارێزگاکانی عێراق مامۆستایان و فەرمانبەرانی وەزارەتی پەروەردەی عێراق بایکۆتی هۆڵەکانی خوێندنیان کرد و خۆپیشاندانیان ئەنجامدا، داواکاریی سەرەکیشیان زیادکردنی مووچە، دابینکردنی یەکەی نیشتەجێبوون، زیادکردنی دەرماڵەی پیشەیی و خێزان و منداڵ و چەند داواکارییەکی دیکەیان هەبوو.

 

ئەمەش بزانە: لەماوەی ڕابردووشدا چەندین گردبوونەوەی چین و توێژە جیا جیاکان لە شارەکانی عێراق بەڕێوەچووە، ئەمەش بەهۆی گرفتی کەمی خزمەتگوزاریی و نادادی کۆمەڵایەتیی لەو ناوچانە.