بڕیارێک لە سوودانییەوە بۆ وەزیرەکان

هیوا

سەرۆکوەزیرانی عێراق داوا لە هەموو وەزیرەکان دەکات لە مانگێکدا لانیکەم دوو سەردان بۆ پارێزگاکان ئەنجام بدەن و دەبێت سەردانەکانیشیان لەسەر خزمەتگوزارییەکان و ژیانی هاووڵاتیان بێت و دەرئەنجامی ئەرێنیی و ڕوونیشی هەبێت.

ئەوەی پێویستە بیزانیت: ئەنجوومەنی وەزیرانی عێراق بەشێوەی خولی ڕۆژانی سێشەممە کۆدەبێتەوە و تیایدا بڕیار، پڕۆژەیاسا و ڕێنمایی تایبەت بە کاروباری وەزارەتەکان و دۆخی وڵات دەردەکات.

ڕاگەیێنراوی فەرمی: ئەنجوومەنی وەزیرانی عێراق لە کۆبوونەوەی ئەمڕۆیدا کە بەسەرپەرشتی محەممەد شیاع سوودانی ئەنجامیدا، بڕیاریدا بەڕێژەی 60% و بۆ ماوەی چوار ساڵ باج بخرێتەسەر دەبەی پلاستیکی و هەموو جۆرەکانی دیکەی پلاستیک کە تەنیا بۆ یەکجار بەکاردێن، بڕیارەکەش دوای 120 ڕۆژی دیکە دەچێتەبواری جێبەجێکردنەوە.

بەشێکی دیکە لە بڕیارەکانی ئەنجوومەنی وەزیران:

- هەموو قوتابیانی پۆلی نۆ و شەشی ئامادەیی بە هەموو بەشەکانیان مافی بەشداریکردن لە تاقیکردنەوەی خولی دووەمی تاقیکردنەوەی وەزاری پێدەدرێت بۆ ساڵی خوێندنی 2024- 2025 (بەبێ ڕەچاوکردنی ئەوەی لە چەند وانە کەوتوون).

- پڕۆژەیاسای هاوبەش لە نێوان حکومەت و کەرتی تایبەت دەنگی لەسەر درا و ڕەوانەی پەرلەمان دەکرێت.

هاوردەکردنی شیش بە قەبارەی (10– 32) ملم 10%ی دیکەی باجی خرایەسەر و بەوەش کۆی باجی سەر ئەم کاڵایە بووە 30%.

- بۆ پارێزگاکانی باکووری عێراق جگە لە پارێزگاکانی هەرێمی کوردستان، بڕیاردرا وەزارەتی کارەبا گرێبەست بۆ دابینکردنی وێستگەی بەرهەمهێنانی کارەبا بەتوانای 500 مێگاوات واژۆ بکات.

- بەبۆنەی جەژنی قیامەوە، ئەنجوومەنی وەزیرانی عێراق ڕۆژانی 20 و 21ـی ئەم مانگەی تەنیا بۆ کریستیانەکان کردە پشووی فەرمی، سبەینێش بەبۆنەی چوارشەممە سوور بۆ پێکهاتەی ئێزدییەکان لە عێراق پشوو دەبێت.