کوردێک سکاڵا لەسەر سەرۆکی دادگای فیدڕاڵی تۆماردەکات

ئاڤا نیوز

هەفتەی داهاتوو دادگای فیدڕاڵی لەبارەی سکاڵای پارێزەرێکی کورد کۆدەبێتەوە، ئەم سکاڵایە جیاوازە، چونکە لەسەر خودی سەرۆکی دادگاکە تۆمارکراوە و تیایدا داوا کراوە دوو ماددەی پەیڕەوی ناوخۆی دادگای فیدڕاڵی هەڵبوەشێنرێنەوە.

چیرۆکی سەرەکی: ئەو سکاڵایەی لەسەر سەرۆکی دادگای فیدڕاڵی تۆمارکراوە پەیوەندی هەیە بە ماددەی 19 لە پەیڕەوی ناوخۆی دادگای فیدڕاڵی، چونکە بەگوێرەی ئەم ماددەیە تەنیا سێ سەرۆکایەتییەکە، وەزیرەکان، دەستە سەربەخۆکان، سەرۆکایەتی ئەنجوومەنی وەزیرانی هەرێم (هەرێمەکان)، دەستەی نەبەستراو بە وەزارەتەکان و پارێزگارەکان دەتوانن سکاڵا لەسەر دەستووریی بوونی یاسا و ڕێنماییەکان پێشکەشی دادگاکە بکەن، بەو مەرجەی سکاڵاکە پەیوەندی بە ئیش و کاری ئەوانەوە هەبێت و کاریگەری لەسەر کاروبارەکانیان دروستبکات.

ڕاگەیێنراوی فەرمی: بەگوێرەی خشتەی کۆبوونەوەکانی دادگای فیدڕاڵی، ڕۆژی سێشەممەی داهاتوو 22ـی نیسان، دادگاکە لەسەر سکاڵایەک کۆدەبێتەوە کە لەلایەن پارێزەرێکی کورد بەناوی ئازاد دۆسکی لەسەر جاسم عمێری، سەرۆکی دادگای فیدڕاڵی تۆمارکراوە، ئەو پارێزەرە لە سکاڵاکەیدا دوو داواکاریی خستووەتەڕوو ئەوانیش بریتین لە:

ماددەی 22 لە پەیڕەوی ناوخۆی دادگای فیدڕاڵی بە نادەستووریی دابنرێت کە دەڵێت تەنیا سێ سەرۆکایەتییەکە و ئەو لایەنانەی لە ماددەی 19ـی هەمان پەیڕەو ناویان هاتووە، بۆیان هەیە سکاڵا لەبارەی یاسای بودجە و ماددەکانی تۆماربکەن.

ماددەی 24ـی هەمان پەیڕەویش بە نادەستووریی دابنرێت کە دەڵێت تەنیا ئەوانەی لە ماددەی 19ـدا ناویان هاتووە، دەتوانن داوای شیکردنەوەی ماددەکانی دەستوور بکەن.